ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କୁ ମାଡ ଘଟଣା

ପିପିଲି : ପିପିଲି ବ୍ଲକ ଯଶୁଆପୁର ପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ ଶ୍ୟାମସୁନ୍ଦର ସ୍ୱାଇଁ (୫୦)ଙ୍କୁ ପଞ୍ଚାୟତ କାର୍ଯ୍ୟାଳୟ ମଧ୍ୟରେ ମାଡ ମରାଯିବା ଘଟଣାକୁ ନେଇ ପିପିଲି ବ୍ଲକ କର୍ମଚାରୀଙ୍କ ମଧ୍ୟରେ ପ୍ରବଳ ପ୍ରତିକ୍ରୀୟା ପ୍ରକାଶ ପାଇଛି। ଆଗାମୀ ୨ଦିନ ମଧ୍ୟରେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାନଗଲେ ବ୍ଲକ କର୍ମଚାରୀମାନେ ସମୁହ କଲମ ଛାଡ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।
ସୂଚନା ଅନୁଯାଇ, ଯଶୁଆପୁର ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) ଶ୍ୟାମସୁନ୍ଦର ସ୍ୱାଇଁ ଗତ ୧ ତାରିଖ ଅପରାହ୍ନରେ ସରକାରୀ କାର୍ଯ୍ୟ ନିମନ୍ତେ ପଞ୍ଚାୟତ କାର୍ଯ୍ୟାଳୟରେ ଉପସ୍ଥିତ ଥିଲେ। ସେହି ସମୟରେ ସେଠାରେ ଉପସ୍ଥିତ ଥିବା ରାମଚନ୍ଦ୍ର ମହାପାତ୍ର ପିଇଓ ଶ୍ରୀସ୍ୱାଇଁଙ୍କୁ ବିଭିନ୍ନ ଅଶ୍ଳିଳ ଭାଷାରେ ଗାଳିଗୁଲଜ କରିବା ସହ ମାଡ ମାରିଥିଲେ। ମାଡ ମାରିବାପରେ ତାଙ୍କୁ କାର୍ଯ୍ୟାଳୟ ଗୃହ ମଧ୍ୟରେ ପୁରାଇ ତାଲା ପକାଇ ଦେଇଥିଲେ। ଏ ସମ୍ପର୍କରେ ଖବର ପାଇ ସାତଶଙ୍ଖ ଫାଣ୍ଡି ପୁଲିସ ତାଙ୍କୁ ସେଠାରୁ ଉଦ୍ଧାର କରିଥିଲା। ଏ ସମ୍ପର୍କରେ ସେ ପିପିଲି ବିଡିଓଙ୍କୁ ଅବଗତ କରାଇବା ସହ ପିପିଲି ପୁଲିସରେ ଲିଖିତ ଅଭିଯୋଗ କରିଥିଲେ। ଏହାକୁ ନେଇ ସୋମବାର ପିପିଲି ବ୍ଳକ କର୍ମଚାରୀଙ୍କ ମଧ୍ୟରେ ପ୍ରବଳ ପ୍ରତିକ୍ରୀୟା ପ୍ରକାଶ ପାଇଥିଲା। ଏନେଇ ବ୍ଲକ କର୍ମଚାରୀଙ୍କର ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା। ପିଇଓ ଶ୍ରୀସ୍ୱାଇଁଙ୍କୁ ମାଡ ମରାଯିବା ଘଟଣାକୁ କର୍ମଚାରୀମାନେ ଦୃଢ ନିନ୍ଦା କରିବା ସହ ଅଭିଯୁକ୍ତ ବିରୋଧରେ କଡା କାର୍ଯ୍ୟାନୁଷ୍ଠାନ ଦାବି କରିଥିଲେ। ଆସନ୍ତା ୨ଦିନ ମଧ୍ୟରେ ମାଡ ମାରିଥିବା ଅଭିଯୁକ୍ତ ବିରୋଧରେ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ ନକଲେ ସମସ୍ତ କର୍ମଚାରୀମାନେ ସମୁହ ଭାବେ କଲମଛାଡ ଆନ୍ଦୋଳନ କରିବେ ବୋଲି ଲିଖିତ ଭାବେ ବିଡିଓ ଶ୍ୟାମସୁନ୍ଦର ଟୁଡୁଙ୍କୁ ଜଣାଇଛନ୍ତି। ବିଡିଓ ଏସମ୍ପର୍କରେ ପୁରୀ ଜିଲାପାଳ, ପିଡି ଡିଆର୍‍ଡିଏ ଓ ପିପିଲି ପୁଲିସକୁ ଅବଗତ କରାଇଥିବା ସୂଚନା ମିଳିଛି। ତେବେ ଅଭିଯୋଗ ମିଳିବା ପରେ ଏନେଇ ପିପିଲି ପୁଲିସରେ ଏକ ମାମଲା ରୁଜୁ ହୋଇଥିବା ଓ ଅଭିଯୁକ୍ତ ଫେରାର୍‍ ଥିବା ବେଳେ ତାଙ୍କୁ ଗିରଫ କରିବା ପାଇଁ ସମସ୍ତ ପ୍ରକାର ଉଦ୍ୟମ ଜାରି ରହିଥିବା ସମ୍ପର୍କରେ ଆଇଆଇସି ଶରତ କୁମାର ସାହୁ ସୂଚନା ଦେଇଛନ୍ତି।