ଫୁଲବାଣୀ: ଫୁଲବାଣୀ ଉପଜିଲାପାଳ ଶେଷଦେବ ମିଶ୍ର ଅଚାନକ ବୁଧବାର ରାତିରେ ଫିରିଙ୍ଗିଆ ବ୍ଲକର ପଲାବୃଡି ପଞ୍ଚାୟତର ଦରିସୁଗା, ମୁସେଲିପଙ୍ଗା ଏବଂ କେଲାପଡ଼ା ପଞ୍ଚାୟତର ସେସ୍କାଯୋଡ଼ି, ତଳଦଣ୍ଡକିଆଠାରେ ଥିବା ଆଶ୍ରମ ବିଦ୍ୟାଳୟର ଛାତ୍ରାବାସ ପରିଦର୍ଶନ କରିଛନ୍ତି। ଅନ୍ତେବାସୀଙ୍କ ଶୟନକକ୍ଷ ସମେତ ଶ୍ରେଣୀଗୃହ, ରୋଷେଇଶାଳ, ଖାଦ୍ୟର ଗୁଣବତ୍ତା, ପାଇଖାନା ପରିବେଶ ଏବଂ ବିଭିନ୍ନ ଆନୁସଙ୍ଗିକ ବ୍ୟବସ୍ଥା ଆଦି ବୁଲି ଦେଖିବା ସହ ପ୍ରଧାନ ଶିକ୍ଷକଙ୍କ ସମେତ ସ୍କୁଲର ଅନ୍ୟ କର୍ମଚାରୀ ଏବଂ ଛାତ୍ରାବାସ ଦାୟିତ୍ୱରେ ଥିବା ସମସ୍ତଙ୍କ ସହ ବିଭିନ୍ନ ବିଷୟରେ ଆଲୋଚନା କରିଥିଲେ। ସେହିଭଳି ବିଦ୍ୟାଳୟରେ ଯେଭଳି ଛାତ୍ରଛାତ୍ରୀଙ୍କ କୌଣସି ପ୍ରକାର ସମସ୍ୟା ନହୁଏ ସେଥିପ୍ରତି ଯତ୍ନଶୀଳ ହେବାକୁ ଦାୟିତ୍ୱରେ ଥିବା ଶିକ୍ଷକ ଏବଂ କର୍ମଚାରୀଙ୍କୁ ପରାମର୍ଶ ଦେଇ ଛାତ୍ରଛାତ୍ରୀମାନଙ୍କ ସହ ମଧ୍ୟ ଆଲୋଚନା କରିଥିଲେ। ଏହି ପରିଦର୍ଶନ ବେଳେ ଫିରିଙ୍ଗିଆ ଗୋଷ୍ଠୀ ଉନ୍ନୟନ ଅଧିକାରୀ ରଶ୍ମି ରଞ୍ଜନ ମହନ୍ତ, ତହସିଲଦାର ଏମ. ଅନୁରାଧା, ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ପ୍ରଣବ ପରିଡ଼ା ଉପସ୍ଥିତ ଥିଲେ। ଏହି କାର୍ଯ୍ୟକ୍ରମ ଏବେ ସବୁ ଦିନ ଚାଲିବ ବୋଲି କହିଛନ୍ତି ମଙ୍ଗଳ ସମ୍ପ୍ରସାରଣ ଅଧିକାରୀ ।
Comments are closed.