ସମାଜ ପୋର୍ଟାଲ ଡେସ୍କ: ଭଦ୍ରକ ଜିଲ୍ଲାରେ ଆଜି ଦିନ ୧୦ଟାରେ ସଟଡାଉନ ଉଠିବା ପରେ ସମସ୍ତ ଫେରିଘାଟରେ ଯାତ୍ରୀବାହୀ ଡ଼ଙ୍ଗା ଯାତାୟାତ ଉପରେ ସଟଡାଉନ କଟକଣା ଲାଗୁ କରାଯାଇଛି। ମହାମାରୀ କରୋନା ଗତ କିଛି ଦିନ ହେବ ଭଦ୍ରକ ଜିଲ୍ଲାରେ କାୟା ବିସ୍ତାର କରିଛି, ଏପରିକି ପଡୋଶୀ ରାଜ୍ୟ ପଶ୍ଚିମବଙ୍ଗରୁ ଲୁଚିଛପି ସ୍ଥଳପଥ ଓ ଜଳପଥରେ କେତକ ପ୍ରବାସୀ ଓଡିଆ ଆସୁଥିବାରୁ ଭଦ୍ରକ ଜିଲ୍ଲାରେ କରୋନା ସଂକ୍ରମଣ ସଂଖ୍ୟା ଦିନକୁଦିନ ବୃଦ୍ଧି ପାଉଛି ଫଳରେ ଗତ ଗୁରୁବାର ରାତ୍ର ୧୦ଟାରୁ ରବିବାର ଦିନ ୧୦ଟା ପ୍ରଯ୍ୟନ୍ତ ଅର୍ଥାତ ୬୦ଘଣ୍ଟା ପାଇଁ ରାଜ୍ୟ ସରକାରଙ୍କ ପକ୍ଷରୁ ସଟଡାଉନ ଜାରି କରାଯାଇଥିଲା, ହେଲେ କେତକ ଲୋକ ଲୁଚିକରି ଜଳପଥରେ ଭଦ୍ରକ ଜିଲାର ଚାନ୍ଦବାଲି ଧାମରା ମୁହାଣ ଅତିକ୍ରମ କରିବା ସହିତ ଉକ୍ତ ଅଞ୍ଚଳରେ ଥିବା ତିନିତର, ଧାନଖଣିଆ, ମୁଆଁ, ଚୌଧୁରୀ, ବାଂଶଡା, ବାଲିଆପାଳ, ପଞ୍ଚୁଟିକିର ଆଦି ୭/୮ଗୋଟି ଘାଟରେ ପାରି ହୋଇ ଜିଲ୍ଲାକୁ ପ୍ରବେଶ କରିବା ସହିତ ପଡୋଶୀ ଜିଲ୍ଲାକୁ ମଟର ଚାଳିତ ବୋଟ ଓ ମାଛଧରା ଟ୍ରଲର ଦ୍ବାରା ଯାତାୟତ କରୁଥିଲେ।
ଏହି ଖବର ଜାଣିବା ପରେ ରବିବାର ଅପରାହ୍ଣରେ ଭଦ୍ରକ ଜିଲ୍ଲାପାଳ ଟୁଇଟ ଯୋଗେ ଜିଲ୍ଲାର ସମସ୍ତ ଫେରିଘାଟକୁ ସଟଡାଉନ ଘୋଷଣା କରିଛନ୍ତି। ଏପରିକି ସମସ୍ତ ଫେରିଘାଟରେ ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି।
