ପାଟଣା : ପାଟଣା ରାଜନଗର ପଞ୍ଚାୟତର ନୂଆଖମଣ ଗ୍ରାମରେ ପାଣିରେ ବୁଡ଼ି ଦୁଇ ଯମଜ ଶିଶୁଙ୍କ ମୃତ୍ୟୁ ହୋଇଛି। ପରିବାରର କନ୍ଦା କଟାରେ ନୁଆଖମଣ ଗାଁ ରେ ହୃଦୟବିଦାରକ ପରିସ୍ଥିତି ସୃଷ୍ଟି ହୋଇଛି। ଦୁଇ ଯମଜ ଶିଶୁଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ରାଜନଗର ଅଞ୍ଚଳରେ ଶୋକର ଛାୟା ଖେଳି ଯାଇଛି।
ପାଟଣା ବ୍ଲକ୍ ରାଜନଗର ପଞ୍ଚାୟତ ନୁଆଖମଣ ଗ୍ରାମର ବାଙ୍କିସାହିରେ ଆଜି ପୂର୍ବାହ୍ନ ୧୧ଟାରେ ଏକ ଖାଲଭର୍ତ୍ତି ପାଣିରେ ବୁଡ଼ିଯାଇ ଦୁଇ ଯମଜ ଶିଶୁଙ୍କ ମୃତ୍ୟୁ ଘଟିଛି। ବାଙ୍କିସାହିର ଯଶୋବନ୍ତ ନାଏକଙ୍କ ୬ ବର୍ଷର ଦୁଇ ଯମଜ ପୁଅ ଆକାଶ ନାଏକ ଓ ବାଦଲ ନାଏକ ଶୌଚ ପାଇଁ ଘର ଠାରୁ ୫୦୦ ମିଟର ଦୂରରେ ଥିବା ପାଣି ଭର୍ତି ବଡ଼ ଖାଲକୁ ଯାଇଥିଲେ। ଅସାବଧାନତା ଯୋଗୁ ସେମାନେ ପାଣିଭର୍ତ୍ତି ଖାଲରେ ପଡି ପ୍ରାଣ ହରାଇଛନ୍ତି। ଘଟଣାଟି ଜଣାପଡିବା ପରେ ଦୁଇ ଶିଶୁଙ୍କୁ ଉଦ୍ଧାର କରାଯାଇ ପ୍ରଥମେ ରାଜନଗର ହସ୍ପିଟାଲ୍ ଓ ତା’ପରେ ସେଠାରୁ ତୁରୁମୁଙ୍ଗା ଡାକ୍ତରଖାନାକୁ ନିଆଯାଇଥିଲା, କିନ୍ତୁ ସେଠାରେ ଚିକିତ୍ସା ସମ୍ଭବ ହୋଇନଥିଲା। ଏହାପରେ ସଙ୍ଗେ ସଙ୍ଗେ ଯମଜ ଶିଶୁ ଦ୍ବୟ ଙ୍କୁ ୧୦୮ ଆମ୍ବୁଲାନ୍ସ ଯୋଗେ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରେ ଉଭୟ ଯମଜ ଉଭୟ ଶିଶୁଙ୍କୁ ଡାକ୍ତର ମୃତ ଘୋଷଣା କରିଛନ୍ତି। ଗାଆଁ ରେ ଏହି ଖବର ପହଞ୍ଚିବା ପରେ ଅଞ୍ଚଳରେ ଶୋକର ଲହରୀ ଖେଳିଯାଇଛି।
