ବିଶ୍ୱ ସ୍ୱାସ୍ଥ୍ୟ ସଂଗଠନ ଦ୍ୱାରା ଜାରି ସୂଚନା ଅନୁଯାୟୀ କରୋନା ମହାମାରୀରେ ଆମେରିକା ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି। ମୋଟ ମୃତ୍ୟୁର ୬୨ ପ୍ରତିଶତ କେବଳ ଆମେରିକାରେ ଘଟିଥିବା କୁହାଯାଇଛି। ଏକ ରିପୋର୍ଟ ଅନୁଯାୟୀ ସାରା ବିଶ୍ୱରେ ୨୩.୬୫ ମିଲିୟନରୁ ଅଧିକ ଲୋକ କରୋନା ଭାଇରସ୍ ଦ୍ୱାରା ସଂକ୍ରମିତ ହୋଇଛନ୍ତି ଏବଂ ୮ ଲକ୍ଷ 11 ହଜାର ୮୯୫ ଜଣଙ୍କର ମୃତ୍ୟୁ ହୋଇଛି।
ବିଶ୍ୱ ସ୍ୱାସ୍ଥ୍ୟ ସଂଗଠନ ଅନୁଯାୟୀ ଅଗଷ୍ଟ ୨୩ ସୁଦ୍ଧା ୧.୭ ନିୟୁତରୁ ଅଧିକ ଲୋକ କରୋନା ସଂକ୍ରମିତ ହୋଇଥିବା ବେଳେ ୩୯ ହଜାର ନୂଆ ମୃତ୍ୟୁ ହୋଇଛି ଯାହା ପୂର୍ବ ତୁଳନାରେ ସଂକ୍ରମଣରେ ୪% ହ୍ରାସ ଏବଂ ମୃତ୍ୟୁ ସଂଖ୍ୟାରେ ୧୨% ହ୍ରାସ ହୋଇଥିବା ଜଣାପଡିଛି। ଦ୍ୱିତୀୟ ପ୍ରଭାବିତ ଅଞ୍ଚଳ ଦକ୍ଷିଣ-ପୂର୍ବ ଏସିଆରେ ୨୮% ନୂଆ ସଂକ୍ରମଣ ଏବଂ ୧୫% ମୃତ୍ୟୁ ଘଟିଥିବା ରିପୋର୍ଟରେ ଦର୍ଶାଯାଇଛି। ଯଦିଓ ଭାରତରେ ସଂକ୍ରମଣ ବୃଦ୍ଧି ପାଉଛି, କିନ୍ତୁ ନେପାଳରେ ଅଧିକ ସଂଖ୍ୟାରେ ସଂକ୍ରମଣ ବୃଦ୍ଧି ପାଉଛି।
ବିଶ୍ୱ ସ୍ୱାସ୍ଥ୍ୟ ସଂଗଠନର ପୂର୍ବ ଭୂମଧ୍ୟସାଗରୀୟ ଅଞ୍ଚଳରେ ସଂକ୍ରମଣ ମାମଲା ୪% ବୃଦ୍ଧି ପାଇଥିବା ବେଳେ ଗତ ସପ୍ତାହରେ ମୃତ୍ୟୁ ସଂଖ୍ୟା କ୍ରମାଗତ ଭାବେ ହ୍ରାସ ପାଇଛି ବୋଲି ହୁ କହିଛି। ପୂର୍ବ ସପ୍ତାହ ତୁଳନାରେ ଲେବାନନ୍, ଟ୍ୟୁନିସିଆ ଏବଂ ଜୋର୍ଡାନରେ ସର୍ବାଧିକ ସଂକ୍ରମଣ ଘଟିଥିବା ରିପୋର୍ଟରେ କୁହାଯାଇଛି। ଗତ ସପ୍ତାହରେ ଆଲଜେରିଆ, କେନିଆ, ଘାନା, ସେନେଗାଲ ଏବଂ ଦକ୍ଷିଣ ଆଫ୍ରିକାରେ ସଂକ୍ରମଣ ହ୍ରାସ ପାଇଥିବାରୁ ଆଫ୍ରିକାରେ ସଂକ୍ରମଣ ଓ ମୃତ୍ୟୁ ସଂଖ୍ୟା ୮% ଏବଂ ୧୧% ହ୍ରାସ ପାଇଛି।
ସେହିପରି ୟୁରୋପୀୟ ଅଞ୍ଚଳରେ ଗତ ତିନି ସପ୍ତାହ ମଧ୍ୟରେ ସଂକ୍ରମଣ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଇଥିବା ବେଳେ ଜାପାନ, ଅଷ୍ଟ୍ରେଲିଆ, ସିଙ୍ଗାପୁର, ଚୀନ୍ ଏବଂ ଭିଏତନାମରେ ସଂକ୍ରମଣ ସଂଖ୍ୟା ୫% ହ୍ରାସ ପାଇଛି। ତେବେ ଦକ୍ଷିଣ କୋରିଆରେ ଧାର୍ମିକ ସମାବେଶ ହେତୁ ସଂକ୍ରମଣ ମାମଲା ୧୮୦ ପ୍ରତିଶତ ବୃଦ୍ଧି ପାଇଛି।
