ନୂଆଦିଲ୍ଲୀ: ଗୁରୁବାର ପାକିସ୍ତାନ ଏକ ଗୁରୁତ୍ବପୂର୍ଣ୍ଣ ନିଷ୍ବତ୍ତି ନେଇଛି । ଭାରତ-ପାକିସ୍ତାନ ମଧ୍ୟରେ ଚଳାଚଳ କରୁଥିବା ଏକମାତ୍ର ରେଳ ସେବାକୁ ପାକିସ୍ତାନ ବନ୍ଦ କରିଦେଇଛି । ସୋମବାର ଏବଂ ଗୁରୁବାର ଦିନ ଏହି ରେଳ ଭାରତ ଓ ପାକିସ୍ତାନ ମଧ୍ୟରେ ଚଳାଚଳ କରେ । ସପ୍ତାହକୁ ମାତ୍ର ଦୁଇ ଥର ଚଳପ୍ରଚଳ କରୁଥିବା ସମଝୌତା ଏକ୍ସପ୍ରେସ ଲାହୋର ଠାରେ ଅଟକି ରହିଥିବା ସୂଚନା ମିଳିଛି ।
ପୁଲୱାମା ଆକ୍ରମଣ ପରେ ଭାରତର ଗୋଟିଏ ପରେ ଗୋଟିଏ କଡା କାର୍ଯ୍ୟାନୁଷ୍ଠାନ ନେଉଥିବା ବେଳେ ଗୁରୁବାର ପାକିସ୍ତାନ ଏଭଳି ନିଷ୍ପତ୍ତି ନେଇଛି । ପୂର୍ବ ନିର୍ଦ୍ଧାରିତ ସମୟ ଅନୁଯାୟୀ ରେଳ ସେବା ଜାରି ରହିବ ବୋଲି ବୁଧବାର ଭାରତ ପକ୍ଷରୁ କୁହାଯାଇଥିଲା । ଆଜି ସକାଳ ୮ଟାରେ ୧୬ ଯାତ୍ରୀଙ୍କୁ ନେଇ ଏହି ରେଳ ପାକିସ୍ତାନର କରାଚି ଠାରୁ ଯାତ୍ରା ଆରମ୍ଭ କରିଥିଲା । ହେଲେ ପାକିସ୍ତାନ ରେଳ ବିଭାଗ କର୍ତ୍ତୃପକ୍ଷ ଏହି ଟ୍ରେନ୍କୁ ଲାହୋର ଠାରେ ଅଟକାଇ ରଖିଛନ୍ତି । ସେଠାରେ ରେଳ ଯାତ୍ରୀମାନଙ୍କୁ ମଧ୍ୟ ଅଟକାଇ ରଖାଯାଇଥିବା ଜଣାଯାଇଛି। ପରବର୍ତ୍ତୀ ନିର୍ଦ୍ଦେଶ ଜାରି ନ ହେବା ଯାଏଁ ସମ୍ଝୌତା ଏକ୍ସପ୍ରେସ୍ ଚଳାଚଳ ବନ୍ଦ ରହିବ ବୋଲି ସୂଚନା ମିଳିଛି ।
ସୂଚନାଯୋଗ୍ୟ, ୧୯୭୧ ଯୁଦ୍ଧ ପରେ ଦୁଇ ଦେଶ ମଧ୍ୟରେ ହୋଇଥିବା ବୁଝାମଣା ପରେ ୨୨ ଜୁଲାଇ ୧୯୭୬ରେ ପାକିସ୍ତାନ ଓ ଭାରତ ମଧ୍ୟରେ ରେଳ ଚଳାଚଳ ଆରମ୍ଭ ହୋଇଥିଲା। ‘ସମଝୌତା’ ବା ବୁଝାମଣାରୁ ଏହି ଟ୍ରେନର ନାମ ସମଝୌତା ଏକ୍ସପ୍ରେସର ରଖାଯାଇଥିଲା ।
