ନୂଆଦିଲ୍ଲୀ : ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ତିକ୍ତତା ମଧ୍ୟରେ ଭାରତ ସରକାର ଏକ ବଡ ନିଷ୍ପତ୍ତି ନେଇଛନ୍ତି । ଦେଶର ଭାବନାକୁ ଧ୍ୟାନରେ ରଖି ସରକାର ଅନଲାଇନ ଇ-କମର୍ସ କମ୍ପାନୀଙ୍କୁ ଚେତାବନୀ ଦେଇଛନ୍ତି ଏବଂ ନୋଟିସ୍ ଜାରି କରିଛନ୍ତି । କେନ୍ଦ୍ର ଗ୍ରାହକ ସୁରକ୍ଷା କର୍ତ୍ତୃପକ୍ଷ(ସିସିପିଏ) ଆମାଜନ ଇଣ୍ଡିଆ, ଫ୍ଲିପକାର୍ଟ, ୟୁବାଏ ଇଣ୍ଡିଆ, ଦ ଫ୍ଲାଗ୍ କମ୍ପାନୀ ଏବଂ ଦ ଫ୍ଲାଗ କର୍ପୋରେସନ ଭଳି ବଡ ଇ-କମର୍ସ କମ୍ପାନୀଙ୍କୁ ନୋଟିସ୍ ପଠାଇଛି । ଏହି କମ୍ପାନୀମାନଙ୍କ ଉପରେ ଅଭିଯୋଗ ଲାଗିଥିବା କି ଏମାନେ ନିଜ ପ୍ଲାଟଫର୍ମରେ ପାକିସ୍ତାନ ପତାକା ଏବଂ ପାକିସ୍ତାନ ସମ୍ପର୍କିତ କିଛି ସାମଗ୍ରୀ ବିକୁଥିଲେ ।
ସରକାରଙ୍କ କହିବାନୁସାରେ ଏଭଳି ସାମଗ୍ରୀର ବିକ୍ରି ଜାତୀୟ ଭାବନା ବିରୁଦ୍ଧ ଏବଂ କୌଣସି ବି ପରିସ୍ଥିତିରେ ଏହାକୁ ବରଦାସ୍ତ କରାଯିବନି । ସରକାର ଏହି ପ୍ଲାଟଫର୍ମଙ୍କୁ ଏଭଳି ସାମଗ୍ରୀକୁ ହଟାଇବାକୁ ନିର୍ଦ୍ଦେଶ ଦେଇଛନ୍ତି । ସମସ୍ତ କମ୍ପାନୀ ଆଇନର ପାଳନ କରିବା ସହ ଆଗକୁ ମଧ୍ୟ ଏଥିପ୍ରତି ଧ୍ୟାନ ଦେବାକୁ ନିର୍ଦ୍ଦେଶ ଦେଇଛନ୍ତି ସରକାର ।
ନିକଟରେ ସୀମାରେ ତିକ୍ତତା ପରେ ପଡୋଶୀ ଦେଶ ପାକିସ୍ତାନ ପାଇଁ ଭାରତବାସୀଙ୍କ ମନରେ କ୍ରୋଧର ବହ୍ନି ଜଳୁଛି । ଏଭଳି ସମୟରେ ଭାରତର ନାଗରିକ ପାକିସ୍ତାନ ବିରୁଦ୍ଧରେ କଠୋର ମନୋଭାବ ଦେଖାଉଛନ୍ତି । ଅନଲାଇନ ଓ୍ବେବସାଇଟରେ ପାକିସ୍ତାନୀ ପତାକା ବିକ୍ରି ହେବା ନିହାତି ନିନ୍ଦନୀୟ ବୋଲି କୁହାଯାଉଛି । ଯଦି କୌଣସି ଇ-କମର୍ସ କମ୍ପାନୀ ଏହି ନିୟମର ପାଳନ କରିବେନି ସେମାନଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ।
