ନୂଆଦିଲ୍ଲୀ : ଟୋକିଓ ଅଲିମ୍ପିକ୍ସ ଓ ପାରାଲିମ୍ପିକ୍ସେର ପଦକ ବିଜୟୀ କ୍ରୀଡ଼ାବିତ୍ମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଦେଇଥିବା ଉପହାର ଗୁଡ଼ିକୁ ସଂସ୍କୃତି ମନ୍ତ୍ରାଳୟ ପକ୍ଷରୁ ଇ-ନିଲାମ ଜରିଆରେ ବିକ୍ରି କରାଯିବାକୁ ନିଷ୍ପତ୍ତି ନିଆଯାଇଛି। ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୭୧ତମ ଜନ୍ମଦିବସ ଅବସରରେ ଅଲିମ୍ପିକ୍ସ ଓ ପାରାଲିମ୍ପିକ୍ସ ପଦକ ବିଜେତା କ୍ରୀଡ଼ାବିତ୍ମାନଙ୍କ ଉପହାର ଇ-ନିଲାମ ଆରମ୍ଭ ହୋଇଛି। ଶନିବାର ଇ-ବିକ୍ରୟର ପ୍ରଥମ ଦିନରେ ୧୧ଜଣ କ୍ରୀଡ଼ାବିତ୍ଙ୍କ ଉପହାରରୁ ୧୦ କୋଟି ଟଙ୍କା ଆୟ ହୋଇଛି। ଟୋକିଓ ଅଲିମ୍ପିକ୍ସରେ ଭାରତ ପାଇଁ ଐତିହାସିକ ସ୍ବର୍ଣ୍ଣ ପଦକ ଜିତିଥିବା ନୀରଜ ଚୋପ୍ରାଙ୍କ ଜାଭେଲିନର ଦାମ୍ ୧ କୋଟି ୫୫ ଲକ୍ଷ ଟଙ୍କାରେ ନିଲାମ ହୋଇଛି।
ବ୍ରେସ ପ୍ରାଇସ୍ ୧ କୋଟି ଟଙ୍କା ଥିବାବେଳେ ଅଧିକ ମୂଲ୍ୟରେ ବିକ୍ରି ହୋଇଛି। ସେହିପରି ଅଲିମ୍ପିକ୍ସରେ ଭାରତ ପାଇଁ ମୁଷ୍ଟିଯୁଦ୍ଧରେ କାଂସ୍ୟ ପଦକ ଜିତିଥିବା ଲଭ୍ଲିନା ବର୍ଗିହାନଙ୍କ ଗ୍ଲୋଭ୍ସ ମଧ୍ୟ ସବୁଠାରୁ ଅଧିକ ମୂଲ୍ୟରେ ବିକ୍ରି ହୋଇଛି। ଲଭ୍ଲିନାଙ୍କ ଗ୍ଲୋଭସର ବ୍ରେସ ପ୍ରାଇସ୍ ୮୦ଲକ୍ଷ ଟଙ୍କା ରହିଥିବାବେଳେ ୧ କୋଟି ୯୨ ଲକ୍ଷ ଟଙ୍କାରେ ନିଲାମ ହୋଇଛି। ପାରାଲିମ୍ପିକ୍ସରେ ସ୍ବର୍ଣ୍ଣ ପଦକ ବିଜୟୀ ହୋଇଥିବା ସୁମିତ ଅଣ୍ଟିଲଙ୍କ ଜାଭେଲିନ୍ ମୂଲ୍ୟ ୧ କୋଟି ୮ ହଜାର ଟଙ୍କାରେ ନିଲାମ ହୋଇଛି। ଏହାର ମୂଳ ମୂଲ୍ୟ ୧ କୋଟି ଟଙ୍କା ରହିଥିଲା। ସେହିପରି ଭାରତୀୟ ମହିଳା ହକି ଦଳର ଅଧିନାୟିକା ରାଣୀ ରାମପାଲଙ୍କ ଷ୍ଟିକ୍ର ମୂଲ୍ୟ ୧ କୋଟି ୧୦୦ଟଙ୍କାରେ ନିଲାମ ହୋଇଛି। ଏହାର ମୂଳ ମୂଲ୍ୟ ୮୦ ଲକ୍ଷ ଟଙ୍କା ରହିଥିଲା। ଇ- ନିଲାମରୁ ମିଳିବାକୁ ଥିବା ଟଙ୍କା ଗଙ୍ଗା ମିଶନରେ ଖର୍ଚ୍ଚ କରାଯିବ ବୋଲି ସରକାରଙ୍କ ପକ୍ଷରୁ କୁହାଯାଇଛି।
