ପାରାଦୀପ: ପାରାଦୀପରେ ଆଇଓସିଏଲ ଟାଉନସିପ୍ ନିକଟରେ ଫାଟିଲା ତେଲ ପାଇପ୍। ଗୁରୁବାର ଆଇଓସିଏଲର ହଳଦୀଆରୁ-ପାରାଦ୍ଵୀପ ପାଇପ ଲାଇନ୍ ନିହାରୁଣି ୬ ନମ୍ବର ଟାଉନସିପ ସମ୍ମୁଖରେ ଅଶୋଧିତ ତେଲ ପାଇପଲାଇନ ଫାଟିଥିବା ସୂଚନା ମିଳିଛି।
କୌଣସି କାରଣରୁ ପାଇପ ଫାଟି ହଜାର ହଜାର ଲିଟର କଳା ତେଲ ଲହଡା ମାରୁଛି। ୨୦୦ମିଟର ତଳୁ ପୋତା ହୋଇଥିବା ପାଇପ କେମିତି ଫାଟିଲା ତା’ର କାରଣ ଜଣାପଡିନାହିଁ। ଆଇଓସିଏଲ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ସ୍ଥିତି ନିୟନ୍ତ୍ରଣ କରିବାକୁ ଚେଷ୍ଟା ଜାରି ରଖିଛନ୍ତି। ଯେପରି କୌଣସି ଦୁର୍ଘଟଣା ନହେବ ତାହାକୁ ଦୃଷ୍ଟିରେ ରଖି ରାସ୍ତା ବନ୍ଦ କରିଦିଆଯାଇଛି। ସେଠାକୁ କାହାକୁ ଯିବାକୁ ଦିଆଯାଉ ନଥିବା ଜଣାପଡ଼ିଛି।
ଅପରପକ୍ଷେ, ହଳଦିଆରୁ ପାରାଦୀପ ଆସିଥିବା ପାଇପ ଫାଟିବା ସହିତ ପ୍ରବଳ ବିସ୍ଫୋରଣରେ ତେଲ ନିର୍ଗତ ହୋଇ ନିହାରୁଣୀ ଗ୍ରାମ୍ୟ ଜଙ୍ଗଲର ବହୁ ପରିମାଣର ବୃକ୍ଷ ସହ ଲଗା ହୋଇଥିବା ଫଳ ଗଛ ଚାରା କ୍ଷତି ଘଟିଛି। ପ୍ରଶାସନ ଓ କମ୍ପାନୀ କର୍ତ୍ତୃପକ୍ଷଙ୍କୁ କ୍ଷତି ଭରଣା କରନ୍ତୁ ବୋଲି ଅନୁରୋଧ କରିବା ସହ ଭବିଷ୍ୟତରେ ଯେପରି ଏଭଳି ଘଟଣା ନଘଟେ ସେଥିପ୍ରତି ପଦକ୍ଷେପ ଗ୍ରହଣ କରନ୍ତୁ ବୋଲି ଦାବି କରିଛନ୍ତି ନିହାରୁଣି ଗ୍ରାମ୍ୟ ଜଙ୍ଗଲର ସଭାପତି।
Comments are closed.