ଭୁବନେଶ୍ୱର: ଅଢ଼େଇ ହଜାର ବର୍ଷରୁ ଅଧିକ ସମୟ ଧରି ଓଡ଼ିଶୀ ସଙ୍ଗୀତର ଦୀର୍ଘ ପରମ୍ପରା, ସମୃଦ୍ଧ ଉତ୍ତରାଧିକାରୀ, ସମ୍ପନ୍ନ ଐତିହ୍ୟ ଏବଂ ଲିଖିତ ଇତିହାସ ରହିଛି। ରାଜା ରାଜୁଡାଙ୍କ ଦରବାର ଏବଂ ସରକାରଙ୍କ ପୃଷ୍ଠପୋଷକତା ହେତୁ ଏହା ବିକଶିତ ହୋଇ ଅଭିବୃଦ୍ଧି ହାସଲ କରିଛି। ଏଥିରେ ଲିପିବଦ୍ଧ ପ୍ରମାଣ ଏବଂ କଳା-ସ୍ଥାପତ୍ୟ ଏବଂ ମୂର୍ତ୍ତିକଳାର ଚମତ୍କାରତା ଅଛି। ଏହା ଶାସ୍ତ୍ରୀୟ ଓଡିଆ ଭାଷାରେ ରଚିତ ନାଟକ ଏବଂ ଗୀତି ସାହିତ୍ୟ ଉପରେ ପ୍ରଭାବ ପକାଇଛି। ଓଡ଼ିଶୀ ସଂଗୀତ ତତ୍ତ୍ୱଗତ ନିୟମ ଏବଂ ବ୍ୟାକରଣଗତ ନିୟମ ପାଳନ କରେ। ସର୍ବୋପରି, ଶ୍ରୋତାମାନଙ୍କ ହୃଦୟରେ ଚିତ୍ତାକର୍ଷକ ପ୍ରଭାବ ସୃଷ୍ଟି କରୁଥିବା ଉନ୍ନତମାନର ନିତ୍ୟନୂତନ ଏବଂ ସୌନ୍ଦର୍ୟ୍ୟପୂର୍ଣ୍ଣ ଆବେଦନ ହେତୁ ଉଚ୍ଚ ମାନର ନିୟମିତ ଗାୟନ ଏବଂ କ୍ରମାଗତ ପ୍ରଦର୍ଶନ ଜାରି ରହିଛି।
ଓଡ଼ିଶୀ ସଂଗୀତଜ୍ଞମାନେ ଶାସ୍ତ୍ରର ନୀତି ଏବଂ ବ୍ୟାକରଣ ଅନୁଯାୟୀ ସଙ୍ଗୀତଶିକ୍ଷା, ଅଭ୍ୟାସ ଏବଂ ପ୍ରଦର୍ଶନ କରୁଛନ୍ତି ଜ୍ଝ ସେମାନେ ରାଜ୍ୟ, ଜାତୀୟ ତଥା ଆନ୍ତର୍ଜାତୀୟ ସ୍ତରରେ ସର୍ବସାଧାରଣ ସ୍ଥାନ ଏବଂ ସମ୍ମିଳନୀରେ ପ୍ରଦର୍ଶନ କରି ଆସୁଛନ୍ତି। ଆକାଶବାଣୀ , ଦୂର ଦର୍ଶନ ଏବଂ ବେସରକାରୀ ବେତାର ଏବଂ ଟି.ଭି ଚ୍ୟାନେଲଗୁଡ଼ିକ ଏହି ମହାନ ସଂଗୀତର ପ୍ରସାରଣ କରୁଛନ୍ତି। ଅନେକ ଓଡ଼ିଶୀ ସଂଗୀତ ଗୁରୁ ଓ ଗାୟକ ସେମାନଙ୍କ ଗାୟନ ପାଇଁ ଜାତୀୟ ତଥା ଆନ୍ତର୍ଜାତୀୟ ସ୍ତରରେ ଖ୍ୟାତି ଅର୍ଜନ କରି ଆସୁଛନ୍ତି। ସଂଗୀତରେ ସେମାନଙ୍କର ଅବଦାନକୁ ସ୍ୱୀକୃତି ଦେଇ ଓଡ଼ିଶା ସଂଗୀତ ନାଟକ ଏକାଡେମୀ ଏବଂ କେନ୍ଦ୍ର ସଂଗୀତ ନାଟକ ଏକାଡେମୀ ଓଡ଼ିଶୀ ସଙ୍ଗୀତ ଶିଳ୍ପୀ ଏବଂ ବାଦକ ମାନଙ୍କୁ ସମ୍ମାନିତ କରିଆସୁଛନ୍ତି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶୀ ସଙ୍ଗୀତକୁ ଶାସ୍ତ୍ରୀୟ ମାନ୍ୟତା ଦେବାକୁ ଅଧୁନା କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି। ଯଦିଓ ଓଡ଼ିଶୀ ନୃତ୍ୟକୁ ଦେଶର ଅନ୍ୟତମ ଶାସ୍ତ୍ରୀୟ ନୃତ୍ୟର ମାନ୍ୟତା ଦିଆଯାଇଛି ଏବଂ ଏହାର ଚରିତ୍ର ଭଙ୍ଗୀ, ଠାଣୀ, ଲାଳିତ୍ୟ, ମୁଦ୍ରା ଇତ୍ୟାଦି ହେତୁ ପ୍ରଖ୍ୟାତି ପାଇପାରିଛି, ବିଡମ୍ବନାର ବିଷୟ, ଓଡ଼ିଶୀ ସଙ୍ଗୀତକୁ ଜାତୀୟ ସ୍ତରରେ ସଂଗୀତର ଅନ୍ୟତମ ଶାସ୍ତ୍ରୀୟ ରୂପ ଭାବରେ ସ୍ୱୀକୃତି ଦିଆଯାଇ ନାହିଁ।
ଏବେ ଓଡିଶା ବିଧାନସଭା ପାଇଁ ସର୍ବସମ୍ମତି କ୍ରମେ ଓଡ଼ିଶୀ ସଙ୍ଗୀତର ଶାସ୍ତ୍ରୀୟ ମାନ୍ୟତା ମିଳିବାପାଇଁ ପଦକ୍ଷେପ ଗ୍ରହଣ କରିବାର ଏକ ସୁବର୍ଣ୍ଣ ସୁଯୋଗ ଆପଣଙ୍କ ହାତ ପାହାନ୍ତାରେ। ଓଡ଼ିଶୀ ସଙ୍ଗୀତକୁ ଶାସ୍ତ୍ରୀୟ ମାନ୍ୟତା ପ୍ରଦାନ ପାଇଁ ଆମ ମାନ୍ୟବର ମୁଖ୍ୟମନ୍ତ୍ରୀ ନେତୃତ୍ୱ ନେଇଛନ୍ତି। ଆପଣଙ୍କ ନେତୃତ୍ୱରେ ବିଧାନ ସଭାର ପବିତ୍ର ଗୃହରେ ଏକ ସଂକଳ୍ପ ପାରିତ ହେବା ପାଇଁ ବର୍ତ୍ତମାନ ଏକ ସୁବିଧାଜନକ ମୁହୂର୍ତ୍ତ ଆସିଛି। ଯେତେବେଳେ ଓଡ଼ିଶୀ ସଙ୍ଗୀତର ଇତିହାସ ଗବେଷକ, ସଂଗୀତଜ୍ଞ ଏବଂ ସାଧାରଣ ଜନତାଙ୍କ ଦ୍ୱାରା ସଂକଳିତ ହେବ, ଆପଣଙ୍କର ନାମ ସେହି ଇତିହାସର ପୃଷ୍ଠାରେ ସ୍ଵର୍ଣାକ୍ଷରରେ ଲେଖାଯିବା। ଭାଷା, ଆନ୍ଦୋଳନ ଓଡ଼ିଶାର କର୍ମକର୍ତ୍ତାମାନେ ବାଚସ୍ପତି ସୂର୍ୟ୍ୟନାରାୟଣ ପାତ୍ର, ବିରୋଧୀଦଳ ନେତା ପ୍ରଦୀପ୍ତ କୁମାର ନାଏକଙ୍କ ସମେତ ତାରାପ୍ରସାଦ ବାହିନୀପତି, ସନ୍ତୋଷ ସିଂ ସାଲୁଜା, ରାଜକିଶୋର ଦାସ, ସୁରେନ୍ଦ୍ର ରାଉତରାୟ, ବିଷ୍ନୁ ଚରଣ ସେଠୀ ପ୍ରମୁଖଙ୍କୁ ଭାଷା ଆନ୍ଦୋଳନର ଆବାହକ ପବିତ୍ର ମହାରଥାଙ୍କ ନେତୃତ୍ୱରେ ଉମା ଚରଣ ମହାନ୍ତି, ଲକ୍ଷ୍ମଣ ଦାସ, ଅଲେଖ ଜେନା, ସୂର୍ୟ୍ୟକାନ୍ତ ସ୍ୱାଇଁ, ନୀଳମଣି ମିଶ୍ର ଓ ନିରଞ୍ଜନ ସାହୁ ପ୍ରମୁଖ ଭେଟି ଦାବି ପତ୍ର ଦେବା ସହ ଆଲୋଚନା କରିଛନ୍ତି। ସମସ୍ତଙ୍କର ଏକ ମନରେ ସ୍ୱୀକାର କରିଛନ୍ତି ଯେ ଏହା ଶାସ୍ତ୍ରୀୟତା ପାଇବା ପାଇଁ ସାମଗ୍ରିକ ଉଦ୍ୟମ ଆବଶ୍ୟକତା ରହିଛି।
