ଭୁବନେଶ୍ୱର: ପଶ୍ଚିମାଝଡ଼ ପ୍ରଭାବରେ ଶନିବାର ଉପକୂଳବର୍ତ୍ତୀ ଜିଲାଗୁଡ଼ିକରେ ସକାଳ ପ୍ରହରରୁ ବିଜୁଳି ଘଡ଼ଘଡ଼ି ସହ ପ୍ରବଳ ବର୍ଷା ହୋଇଛି। େଦ୍ବୖତନଗରୀ ଭୁବନେଶ୍ବର ଏବଂ କଟକର ବିଭିନ୍ନ ସ୍ଥାନରେ ଜଳମଗ୍ନ ପରିସ୍ଥିତି ଉପୁଜିଛି। ତଳିଅା ଏବଂ ବସ୍ତି ଅଞ୍ଚଳର କିଛି ଘରେ ବର୍ଷା ପାଣି ପଶିଛି। ଆଉ କିଛି ଅଞ୍ଚଳରେ ବିଜୁଳି ଘଡ଼ଘଡ଼ି ସହ ହାଲୁକାରୁ ମଧ୍ୟମ ଧରଣ ବର୍ଷା ହୋଇଥିବା ପାଣିପାଗ ବିଭାଗ ପକ୍ଷରୁ ଜଣାପଡିଛି। ମାର୍ଚ୍ଚ ୧୫ରୁ ରାଜ୍ୟରେ ଗୋଟିଏ ପରେ ଗୋଟିଏ ପଶ୍ଚିମାଝଡ଼ର ପ୍ରଭାବ ଲାଗି ରହିବା ହେତୁ ତାପମାତ୍ରା ହ୍ରାସ ପାଇଥିଲା। ମେଘୁଆ ପାଗ ରହୁଥିଲା; କିନ୍ତୁ ପଶ୍ଚିମାଝଡ଼ ପ୍ରଭାବ ପ୍ରତ୍ୟାହୃତ ହୋଇଥିବାରୁ ଆସନ୍ତା ୨୪ ଘଣ୍ଟା ପରେ ରାଜ୍ୟରେ ଦିନ ତାପମାତ୍ରା ୫ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବାର ସମ୍ଭାବନା ରହିଛି ବୋଲି ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର ପୂର୍ବାନୁମାନ କରିଛି।
ଶନିବାର ସକାଳୁ ଆକାଶରେ କଳାହାଣ୍ଡିଆ ମେଘ ଘୋଟି ଆସିଥିଲା, ବିଜୁଳି ଘଡ଼ଘଡ଼ି ସହ ପ୍ରବଳ ବର୍ଷା ହୋଇଥିଲା। ଗୋପାଳପୁରରେ ସବୁଠୁ ଅଧିକ ବର୍ଷା ୮୭.୨ ମିମି ରେକର୍ଡ ହୋଇଥିବା ବେଳେ ଛତ୍ରପୁର ୫୨ ମିମି, ନୟାଗଡ଼ ୨୩ ମିମି, ପାରାଦ୍ବୀପ ୨୬.୪ ମିମି, ଭୁବନେଶ୍ବର ୧୦.୬ ମିମି ଏବଂ କଟକରେ ୧୨.୪ ମିମି ବର୍ଷା ହୋଇଛି। ଏଥିସହିତ ବାଲେଶ୍ବର, ଚାନ୍ଦବାଲି, ଭଦ୍ରକ, ପୁରୀ, ଅନୁଗୋଳ, ସମ୍ବଲପୁର, ପାରଳାଖେମୁଣ୍ଡି, ଢେଙ୍କାନାଳ, ଜଗତସିଂହପୁର ଏବଂ କେନ୍ଦ୍ରାପଡ଼ାରେ ବର୍ଷା ହୋଇଛି। ଆସନ୍ତା ୨୪ ଘଣ୍ଟା ମଧ୍ୟରେ ଉପକୂଳ ଓଡ଼ିଶା ସହ ମାଲକାନଗିରି, କୋରାପୁଟ, ମୟୂରଭଞ୍ଜ ଏବଂ ରାୟଗଡ଼ା ଜିଲାର କିଛି ଅଞ୍ଚଳରେ ବଜ୍ରପାତ ସହ ବର୍ଷା ହେବାର ଆଶଙ୍କା ରହିଛି।
