ଗୋପାଳପୁର : ସାରା ଓଡିଶା ରଜ ପାଳନରେ ମସଗୁଲ ରହିଥିବାବେଳେ ଗୋପାଳପୁର ବେଳାଭୂମିରେ ୧୫ ତାରିଖରେ ପୁରୁଷ ବନ୍ଧୁଙ୍କ ସହ ବୁଲିବାକୁ ଆସିଥିବା ଛାତ୍ରୀଙ୍କୁ ଗଣଦୁଷ୍କର୍ମ ହୋଇଥିଲା । ଏହି ଘଟଣାରେ ସମ୍ପୃକ୍ତ ରହିଥିବା ସମସ୍ତ ୧୦ ଜଣ ଅଭିଯୁକ୍ତକୁ ଗିରଫ କରି ପୁଲିସ କୋର୍ଟ ଚାଲାଣ କରିଥିଲା । ଏମାନଙ୍କ ମଧ୍ୟରୁ ୪ ଜଣ ନାବାଳକ ରହିଥିବାବେଳେ ୬ ଜଣ ସାବାଳକ ରହିଥିଲେ । ଘଟଣାର ଅଧିକ ତଦନ୍ତ ପାଇଁ ରାଜ୍ୟ ସରକାର ମାମଲା କ୍ରାଇମବ୍ରାଞ୍ଚକୁ ହସ୍ତାନ୍ତର କରିଥିଲେ । ଅଭିଯୁକ୍ତ ମାନଙ୍କୁ କ୍ରାଇମବ୍ରାଞ୍ଚ ଟିମ ପକ୍ଷରୁ ରିମାଣ୍ଡରେ ନେଇ ଅଧିକ ତଦନ୍ତ କରିବା ପାଇଁ କୋର୍ଟରେ ଆବେଦନ କରାଯାଇଥିଲା । କୋର୍ଟ ଆବେଦନକୁ ମଞ୍ଜୁର କରିଥିବାରୁ ଆଜି ଅପରାହ୍ନରେ ବ୍ରହ୍ମପୁର ମଣ୍ଡଳ କାରାଗାରରୁ ୬ ଜଣ ଅଭିଯୁକ୍ତ ବେଲଗାଁ ଥାନା ଅନ୍ତର୍ଗତ ପାଟପୁର ଗାଁର କୁନାଲ ପ୍ରଧାନ, ହିଞ୍ଜିଳି ଥାନା ଅନ୍ତର୍ଗତ ବୁରୁପଡା ଗ୍ରାମର ବାବୁରାମ ଦଳାଇ, ଲକ୍ଷ୍ମଣ ପ୍ରଧାନ, ସିକିରି ଗ୍ରାମର ଓମ୍ ପ୍ରଧାନ, ଦୀପକ ତରାଇ ଓ ପୁରୁଷୋତ୍ତମପୁର ଅଂଚଳର ପ୍ରମୋଦ ନାୟକ ପ୍ରମୁଖଙ୍କୁ ରିମାଣ୍ଡରେ କ୍ରାଇମବ୍ରାଞ୍ଚ ଆଣିଛି। ରିମାଣ୍ଡରେ ଅଭିଯୁକ୍ତମାନଙ୍କୁ ଅଣାଯାଇ ପ୍ରଥମେ ଗୋପାଳପୁର ସ୍ୱାସ୍ଥ୍ୟକେନ୍ଦ୍ରରେ ଅଭିଯୁକ୍ତ ମାନଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା। ସେଠାରୁ ଗୋପାଳପୁର ଥାନାକୁ ଅଣାଯାଇଥିଲା। କ୍ରାଇମବ୍ରାଞ୍ଚ ଆଇ.ଜି ଏସ ସାଇନିଙ୍କ ସମେତ ୫ ଜଣିଆ ଟିମ, ଥାନା ଅଧିକାରୀ ପ୍ରଶାନ୍ତ କୁମାର ମଲ୍ଲିକ,ବ୍ରହ୍ମପୁର ଏସ.ଡ଼ି.ପି.ଓ ପିୟୂଷ ରଞ୍ଜନ ଛୋଟରାୟ ପ୍ରମୁଖ ଉପସ୍ଥିତ ରହି ୬ ଜଣ ଅଭିଯୁକ୍ତକୁ ଘଟଣା ଦିନର ସମସ୍ତ ବିଷୟ ପଚାରା ଉଚରା କରୁଥିବା ଜଣାପଡ଼ିଛି । ଏହାପରେ ଘଟଣାସ୍ଥଳକୁ ଯାଇ ସିନ ରିକ୍ରିଏସନ କରିଛି ।
Comments are closed.