ଆଠଗଡ଼: ଆଠଗଡ଼ ସହରର ସମସରପୁରସ୍ଥିତ ମା ଚଣ୍ଡି କଳା ପରିଷଦ ପକ୍ଷରୁ ରାମଲୀଳା ନାଟକର ୮୦ତମ ବାର୍ଷିକ ଉତ୍ସବ ଶୁକ୍ରବାର ରାତିରେ ଅନୁଷ୍ଠିତ ହୋଇଯାଇଛି। ଅନୁଷ୍ଠାନର ସଭାପତି ଶତୃଘ୍ନ ପରିଡ଼ାଙ୍କ ପୌରୋହିତ୍ୟରେ ଅନୁଷ୍ଠିତ ଏହି ଉତ୍ସବରେ ମୁଖ୍ୟଅତିଥି ଭାବେ ସ୍ଥାନୀୟ ବିଧାୟକ ତଥା କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଯୋଗଦେଇ ଦୀର୍ଘ ୮୦ବର୍ଷ ଧରି ପୌରାଣିକ କଥାବସ୍ତୁ ଉପରେ ପର୍ଯ୍ୟବେସିତ ରାମଲୀଳା ଲୋକକଳାକୁ ଅନୁଷ୍ଠାନ ପକ୍ଷରୁ ଉଜ୍ଜୀବିତ ରଖିବା ବାସ୍ତବିକ ପ୍ରଂଶସନୀୟ ବୋଲି ମତବ୍ୟକ୍ତ କରିଥିଲେ। ଏଥିରେ ମୁଖ୍ୟବକ୍ତା ଭାବେ ପୂର୍ବତନ ଉପନଗରପାଳ ଲଳିତମୋହନ ନାୟକ ଯୋଗଦେଇ ଅନୁଷ୍ଠାନ ନିଜର ଗୁରୁ ରଘୁନାଥ ବେଉରାଙ୍କ ଦ୍ୱାରା ରଚିତ ରାମଲୀଳା ନାଟକକୁ ୮୦ବର୍ଷ ଧରି ପରିବେଷଣ କରିଆସୁଛନ୍ତି ବୋଲି ପ୍ରକାଶ କରିଥିଲେ। ଉପନଗରପାଳ ବି ଶୁଭ୍ରଶଙ୍କର ଜ୍ୟୋତି ଏଥିରେ ସମ୍ମାନିତ ଅତିଥି ଭାବେ ଯୋଗଦେଇ ନିଜର ବକ୍ତବ୍ୟ ରଖିଥିଲେ। ଏହି ଅବସରରେ ମନ୍ତ୍ରୀ ଶ୍ରୀ ସ୍ୱାଇଁ ୭ଜଣ ପୁରାତନ ରାମଲୀଳା କଳାକାରଙ୍କୁ ପୁଷ୍ପଗୁଚ୍ଛ, ଉତ୍ତରୀୟ ଓ ମାନପତ୍ର ଦେଇ ସମ୍ବର୍ଦ୍ଧିତ କରିଥିଲେ। ଅନୁଷ୍ଠାନର ସଂପାଦକ ସୁଶାନ୍ତ କୁମାର ସାହୁ ଓ ଅନ୍ୟ ସମସ୍ତ ସଦସ୍ୟ କାର୍ଯ୍ୟକ୍ରମ ପରିଚାଳନା କରିଥିଲେ। ଶୁକ୍ରବାର ରାତିରେ ରାମଲୀଳା ନାଟକ ତାଡକା ବଧ ପରିବେଷଣ କରିଥିଲେ। ଆସନ୍ତା ୨୭ତାରିଖ ପର୍ଯ୍ୟନ୍ତ ପ୍ରତିଦିନ ରାତିରେ ରାମଲୀଳା ନାଟକ ପରିବେଷଣ କରାଯିବ ବୋଲି ଅନୁଷ୍ଠାନ ପକ୍ଷରୁ କୁହାଯାଇଛି।
Popular Categories
Previous article
Next article