ଭୁବନେଶ୍ବର: ‘କୌନ୍ ବନେଗା କରୋଡ଼ପତି-୧୬’ରେ ଚମକିଲେ ଓଡ଼ିଆ ଝିଅ। ଦର୍ଶକଙ୍କ ସମେତ ସୁପରଷ୍ଟାର ଅମିତାଭ ବଚ୍ଚନଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ଅଧିକାର କରିଛନ୍ତି ଓଡ଼ିଆ ଝିଅ କରିଶ୍ମା ଶର୍ମା। ଶୋ’ର ‘ସୁପର ସନ୍ଦୁକ୍ ସେଗମେଣ୍ଟ’ରେ ୧୨.୫ ଲକ୍ଷ ଜିତିବା ସହ ବିଗ୍ ବିଙ୍କ ପକ୍ଷରୁ ମଧ୍ୟାହ୍ନ ଭୋଜନ ପାଇଁ ନିମନ୍ତ୍ରଣ ମଧ୍ୟ ପାଇଛନ୍ତି କରିଶ୍ମା, ଯାହାକୁ ନେଇ ସେ ବେଶ୍ ଉତ୍ସାହିତ ଥିବା ପ୍ରକାଶ କରିଛନ୍ତି।
ପ୍ରାରମ୍ଭିକ ପର୍ଯ୍ୟାୟରେ ଭୟଭୀତ ଥିବା କରିଶ୍ମା ଚ୍ୟାଲେଞ୍ଜିଂ ତଥା କଷ୍ଟକର ପ୍ରଶ୍ନଗୁଡ଼ିକୁ ଅତି ଚମତ୍କାର ଭାବେ ସାମ୍ନା କରି ସଭିଙ୍କଠାରୁ ପ୍ରଶଂସା ସାଉଁଟିଛନ୍ତି। ତାଙ୍କ ଭୟ, ଚାପ ଓ ଉତ୍କଣ୍ଠାକୁ ଲକ୍ଷ୍ୟ କରି ବିଗ୍ ବି ବ୍ୟକ୍ତିଗତ ଭାବେ ତାଙ୍କୁ ମାର୍ଗଦର୍ଶନ ଏବଂ ଉତ୍ସାହ ପ୍ରଦାନ କରି ମାନସିକସ୍ତରରେ ଦୃଢ କରାଇଥିଲେ। ତାଙ୍କର ଉତ୍ତମ ପ୍ରଦର୍ଶନ ଶେଷରେ ତାଙ୍କୁ ‘ସୁପର ସନ୍ଦୁକ୍ ଚ୍ୟାଲେଞ୍ଜ’ରେ ସମସ୍ତ ୧୦ଟି ପ୍ରଶ୍ନର ସଫଳତାର ସହ ଉତ୍ତର ଦେବାରେ ସକ୍ଷମ କରିଥିଲା।
ନିଜ ବାପାଙ୍କ ଇଚ୍ଛାକୁ ପୂରଣ କରିବାକୁ ମୟୁରଭଞ୍ଜ ଜିଲା ରାଇରଙ୍ଗପୁରରୁ ହଟ୍ ସିଟ୍ ପର୍ଯ୍ୟନ୍ତ ତାଙ୍କର ଏହି ଉଲ୍ଲେଖନୀୟ ଯାତ୍ରା ସାରା ଭାରତରେ ଦର୍ଶକଙ୍କୁ ଆକର୍ଷିତ କରିଛି। ଶୋ’ରେ ସେ ୨୫-୩୦ ସଦସ୍ୟ ବିଶିଷ୍ଟ ତାଙ୍କ ଯୌଥ ପରିବାର ସହି ଏକ ଭିଡିଓ କଲ୍ ଅନୁରୋଧ କରିଥିଲେ। ଅମିତାଭ ବଚ୍ଚନ, ତାଙ୍କ ପରିବାରର ଆକାରକୁ ମଜାଳିଆ ଢଙ୍ଗରେ ସ୍ୱୀକାର କରି ଭିଡିଓ କଲ୍ରେ ସେମାନଙ୍କ ସହ କଥା ହୋଇଥିଲେ, ଯାହା କରିଶ୍ମା ଏବଂ ତାଙ୍କ ପ୍ରିୟଜନଙ୍କ ପାଇଁ ବେଶ୍ ଆନନ୍ଦର ମୁହୂର୍ତ୍ତ ଥିଲା। କେବିସିରେ ଏହି ସଫଳତା ହାସଲ କରିବାରେ ୟୁପିଏସସି ପାଇଁ ତାଙ୍କ ପ୍ରସ୍ତୁତି ବେଶ୍ ସହାୟକ ହୋଇଥିବା କହିଛନ୍ତି କରିଶ୍ମା।
