ଭୁବନେଶ୍ୱର: ରାଜ୍ୟରେ ନର୍ସିଂ ଅଧିକାରୀଙ୍କୁ ଉପେକ୍ଷା କରାଯାଉଛି। ପୁରୁଣା ସରକାରଙ୍କୁ ଗୁହାରି କରିଥିଲେ ସେ ଶୁଣିଲେନି, ନୂଆ ସରକାର କ୍ଷମତାକୁ ଆସିବା ପରେ ମଧ୍ୟ ବାରମ୍ବାର ଦାବି ଜଣାଇବା ପରେ ସମସ୍ୟାର ସମାଧାନ ହେଲାନାହିଁ। ତେଣୁ ଦାବି ପୂରଣ ପାଇଁ ବିକଳ୍ପ ପନ୍ଥା ଗ୍ରହଣ କରିବେ ନର୍ସିଂ ଅଧିକାରୀ। ଆସନ୍ତା ୧୪ ତାରିଖରୁ ରାଜ୍ୟର ସମସ୍ତ ନର୍ସିଂ ଅଧିକାରୀ କଳା ବ୍ୟାଜ୍ ପରିଧାନ କରିବା ସହିତ ୨୧ ତାରିଖରୁ ରୋଗୀସେବାରେ ବାଧା ନଦେଇ ଆନ୍ଦୋଳନ କରିବା ନିମନ୍ତେ ସର୍ବସମ୍ମତିକ୍ରମେ ନିଷ୍ପତ୍ତି ନେଇଛନ୍ତି। ଯଦି ରାଜ୍ୟ ସରକାର ଦାବିଗୁଡିକ ଉପରେ ଦୃଷ୍ଟି ନଦିଅନ୍ତି ତେବେ ଆସନ୍ତା ୨୭ ତାରିଖରୁ ଅନିର୍ଦିଷ୍ଟ ସମୟ ପାଇଁ କାର୍ଯ୍ୟ ବନ୍ଦ ଆନ୍ଦୋଳନ କରିବେ ବୋଲି ସାଧାରଣ ପରିଷଦ ବୈଠକରେ ନିଷ୍ପତ୍ତି ନିଆଯାଇଛି। ଓଡିଶା ନର୍ସିଂ କର୍ମଚାରୀ ସଂଘ ପକ୍ଷରୁ ରାଜ୍ୟସ୍ତରୀୟ ସାଧାରଣ ପରିଷଦ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ରାଜ୍ୟ ଏବଂ ସମସ୍ତ ଜିଲାର ପ୍ରତିନିଧିମାନେ ଯୋଗ ଦେଇଥିଲେ। ରାଜ୍ୟ ସଭାନେତ୍ରୀ ସୁଚିସ୍ମିତା ଦାସଙ୍କ ଅଧ୍ୟକ୍ଷତାରେ ନର୍ସିଂ ଅଧିକାରୀମାନଙ୍କ ୧୦ ଦଫା ଦାବି ସମ୍ବନ୍ଧରେ ପୁଙ୍ଖାନୁପୁଙ୍ଖ ଆଲୋଚନା କରାଯାଇଥିଲା । ବିଶେଷ କରି ୪୦ ବର୍ଷ ପୂର୍ବରୁ ତିଆରି ହୋଇଥିବା ସଂଘର ପୁରୁଣା ସମ୍ବିଧାନରେ ଥିବା ବିଭିନ୍ନ ନିୟମଗୁଡିକୁ ସଂଶୋଧନ କରିବା ପାଇଁ ନିଷ୍ପତ୍ତି ହୋଇଛି। ନଭେମ୍ବରରେ ରାଜ୍ୟସ୍ତରୀୟ ସାଧାରଣ ସଭାରେ ଉକ୍ତ ନିୟମ ଗୁଡିକୁ ଅନୁମୋଦନ କରାଯିବା ସହିତ ରାଜ୍ୟସ୍ତରୀୟ ସମ୍ମିଳନୀ ଅନୁଷ୍ଠିତ ହେବ ବୋଲି ନିଷ୍ପତ୍ତି ନିଆଯାଇଛି। ଦାବିଗୁଡିକ ମଧ୍ୟରେ ନର୍ସିଂ ଅଧିକାରୀଙ୍କ ୨୦୧୩ ପୂର୍ବରୁ ୬ ବର୍ଷ ଚୁକ୍ତିଭିତ୍ତିକ ଚାକିରି ଅବଧିକୁ ମୂଳ ଚାକିରିରେ ମିଶାଇବା, ନର୍ସିଂ ଅଧିକାରୀଙ୍କୁ ବରିଷ୍ଠତା ଭିତ୍ତିରେ ପଦୋନ୍ନତି ଦେବା, ଡ୍ରେସ୍ କୋଡ଼ ପରିବର୍ତ୍ତନ କରିବା ଏବଂ ନର୍ସିଂ ଅଧିକାରୀଙ୍କ ଛୁଟି ବାବଦରେ ଥିବା ଅସଙ୍ଗତିକୁ ଦୂର କରିବା ଆଦି ରହିଛି। କାର୍ଯ୍ୟକ୍ରମରେ ସାଧାରଣ ସମ୍ପାଦକ ଅଶ୍ବିନୀ କୁମାର ଦାସ, ଉପସଭାପତି ମୁରଲୀଧର ମିଶ୍ର, ରିଲୁ କୁମାର ପଲେଇ, ଗୁରୁବାରୀ ସେଠୀ ପ୍ରମୁଖ ଉପସ୍ଥିତ ଥିଲେ।
Comments are closed.