ନୀଳଗିରି: ବାଲେଶ୍ଵର ଜିଲ୍ଲା ଅଧୀନ ନୀଳଗିରି ଥାନା ଭିତର ଭିଡ଼ିଓ ସମ୍ପ୍ରତି ସୋସିଆଲ ମିଡ଼ିଆରେ ଭାଇରଲ ହେବାକୁ ଲାଗିଛି। ଡାକ ବିଭାଗରେ କାମ କରୁଥିବା ଜଣେ ଅଣପୁଲିସ ଥାନାର ସିସିଟିଏନଏସ ଠାରୁ ଆରମ୍ଭ କରି ସବୁ ଗୁରୁତ୍ୱପୂର୍ଣ୍ଣ କାଗଜରେ ହାତ ମାରୁଥିବା ଅଭିଯୋଗ ହୋଇଛି। ସେହିପରି ଘଣ୍ଟା ଘଣ୍ଟା ଧରି ଜଣେ ମହିଳା ପୁଲିସଙ୍କ ସହ ଥଟ୍ଟାମଜା କରୁଥିବା ଯୋଗୁଁ ସାଧାରଣ ଲୋକ ନ୍ୟାୟ ପାଇଁ ଥାନାକୁ ଆସି ଫେରୁଥିବାରୁ ଅଞ୍ଚଳରେ ଅସନ୍ତୋଷ ଭରି ଦେଇଛି। ଏହା ଦୀର୍ଘ ମାସ ଧରି ଏଭଳି ପରିସ୍ଥିତି ଉପୁଜିଥିବା କୁହାଯାଉଛି।
ସମ୍ପ୍ରତି ନୀଳଗିରି ଥାନାଟି ମୁରବୀ ଶୂନ୍ୟ ହୋଇଥିବା ଯୋଗୁଁ ଏପରି ଘଟୁଛି। କିଛିଦିନ ପୂର୍ବରୁ ସ୍ଥାନୀୟ ଆଇଆଇସି ପ୍ରଭଞ୍ଜନ ବେହେରାଙ୍କ ଭୋଗରାଇ ଥାନାକୁ ବଦଳି ହୋଇଯିବା ଏବଂ ଏହି ଥାନାରେ କୌଣସି ଅଧିକାରୀଙ୍କୁ ନିଯୁକ୍ତି ମିଳିନଥିବା ଯୋଗୁଁ ବାଘ ଘରେ ମିରିଗ ନାଟ ଅବସ୍ଥା ସୃଷ୍ଟି ହୋଇଛି। ସେପଟେ ପ୍ରତିଦିନ ଥାନା ଭିତରେ ଏହି ଡାକ କର୍ମଚାରୀଙ୍କୁ ପଶିବାକୁ କିଏ ଅନୁମତି ଦେଲା ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଉପରୋକ୍ତ ଘଟଣା ସମ୍ପର୍କରେ ନୀଳଗିରି ଏସଡିପିଓ ରୀତେଶ ମହାପାତ୍ରଙ୍କୁ ପଚରା ଯିବାରୁ ସେ ଉକ୍ତ ଅଭିଯୋଗ ସମ୍ପର୍କରେ ଖବର ପାଇଛନ୍ତି ଏବଂ ଏହି ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ନେବେ ବୋଲି ଜଣାଇଛନ୍ତି।
