ନୀଳଗିରି: ବାଲେଶ୍ୱର ଜିଲା, ନୀଳଗିରି ଥାନା ଅଧୀନ ନରସିଂହପୁର ଗାଁର ଜଣେ ଉପଭୋକ୍ତା ଚୋରାରେ ବିଦ୍ୟୁତ ସଂଯୋଗ କରୁଥିବା ଅଭିଯୋଗରେ ମିତ୍ରପୁର ସେକ୍ସନର କର୍ମଚାରୀମାନେ ପହଞ୍ଚି ଗତ ୨୩ତାରିଖରେ ବିଦ୍ୟୁତ ବିଛିନ୍ନ କରିଥିଲେ ।
ଏହାକୁ କେନ୍ଦ୍ରକରି ୭ଜଣ କର୍ମଚାରୀଙ୍କୁ ମରଣାନ୍ତକ ଆକ୍ରମଣ କରାଯାଇଥିଲା । ଏହି ଘଟଣାରେ ବିଭାଗ ପକ୍ଷରୁ ନୀଳଗିରି ଥାନାରେ ଏତଲା ଦିଆଯିବା ପରେ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ସେପଟେ ନ୍ୟାୟ ପାଇଁ ତଥା ଅଭିଯୁକ୍ତଙ୍କୁ ଗିରଫ ଦାବିରେ ବିଦ୍ୟୁତ କର୍ମଚାରୀମାନେ ଧାରଣା ବସିବେ ବୋଲି ମଧ୍ୟ ଚେତାବନୀ ଦେଇଥିଲେ ।
ଉକ୍ତ ଘଟଣାରେ ଆଇଆଇସି ଗୋପାଳ ଚନ୍ଦ୍ର କର୍ଣ୍ଣ ଏକ ସ୍ୱତନ୍ତ୍ର ଟିମ୍ ଗଠନ କରି ଆକ୍ରମଣକାରୀଙ୍କୁ ଧରିବାକୁ ତଲାସି ଆରମ୍ଭ କରିଥିଲେ । ଆକ୍ରମଣକାରୀ ରାଜା ଓରଫ କୃଷ୍ଣଚନ୍ଦ୍ର ପଣ୍ଡା ଓ ଚିତ୍ତରଞ୍ଜନ ସିଂହ ମୟୂରଭଞ୍ଜ ଜିଲା ଖୁଣ୍ଟା ଥାନା ଅଧୀନ ଭଙ୍ଗାଚଟୁ ଗାଁ ନିକଟରେ ଥିବା ଏକ ନିଛାଟିଆ ଜଙ୍ଗଲରେ ଆତ୍ମଗୋପନ କରିଥିବା ଖବରପାଇ ପୁଲିସ ଚଢ଼ଉ କରିଥିଲା । ଦୀର୍ଘ କିମି ଯାଏଁ କାଦୁଅ ରାସ୍ତାରେ ଚାଲି ଚାଲି ପୁଲିସ ସେମାନଙ୍କୁ ଗିରଫ କରିଥିବା ସୂଚନା ମିଳିଛି ।
Comments are closed.