ନୂଆଦିଲ୍ଲୀ : ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସଇ) ଅଂଶଧନର କ୍ରୟ ଏବଂ ବିକ୍ରୟରେ ପୈଠ ବ୍ୟବସ୍ଥାରେ ସୁଧାର କରିବାକୁ ପ୍ରସ୍ତୁତ ହେଉଛି । ଗୁରୁବାର ଷ୍ଟକ୍ ଏକ୍ସଚେଞ୍ଜ ଟି+ଶୂନ୍ୟ ସମାଧାନ ବ୍ୟବସ୍ଥାର ପରୀକ୍ଷାମୂଳକ ଭାବେ ୨୫ ଅଂଶଧନ ସହିତ ଆରମ୍ଭ କରୁଛି । ଅର୍ଥାତ୍ ଯେଉଁ ଦିନ ଆପଣ ସେୟାର ବା ଅଂଶଧନ ବିକିବେ ସେହିଦିନ ଆପଣଙ୍କୁ ଆପଣଙ୍କ ପଇସା ମିଳିଯିବ ।
ଏବେ ସେୟାର ବଜାରରେ ଟି+୧ ସମାଧାନ ବ୍ୟବସ୍ଥା ଲାଗୁ ଅଛି । ଅର୍ଥାତ୍ ସେୟାର ବିକିବାର ଦିନକ ପରେ ପୈଠ ହୋଇଥାଏ । ୩ ମାସ ପୂର୍ବରୁ ବଜାର ରେଗୁଲେଟର ଟି+ଶୂନ୍ୟ ପାଇଁ ଦସ୍ତାବେଜ ପ୍ରସ୍ତୁତ କରିଥିଲା ଏବଂ ୧୨ ଜାନୁୟାରୀ ପର୍ଯ୍ୟନ୍ତ ଏହାକୁ ଲାଗୁ କରିବା ପାଇଁ ରାୟ ମାଗିଥିଲା । ୬ ଦିନ ପୂର୍ବରୁ ଷଷ୍ଟ ପର୍ଯ୍ୟାୟ ବିଶିଷ୍ଟ ନିର୍ଦ୍ଦେଶାବଳୀ ଜାରି କରିଥିଲା ସେବି ।
ସେବି କହିଛି କି ସମସ୍ତ ନିବେଶକ ଟି+ଶୂନ୍ୟ ସମାଧାନ ବ୍ୟବସ୍ଥା ପାଇଁ ଯୋଗ୍ୟ ହେବେ । ସମାନ ଦିନ ପୈଠ ନିୟମକୁ ୨ଟି ପର୍ଯ୍ୟାୟରେ ଲାଗୁ କରିବାକୁ ପ୍ରସ୍ତାବ ଦେଇଥିଲା ସେବି । ପ୍ରଥମ ପର୍ଯ୍ୟାୟରେ ଯଦି ଆପଣ ବଜାର ଖୋଲା ଥିବା ଦିନ ସାଢେ ଗୋଟେ ସମୟରେ ଅଂଶଧନ ବିକୁଛନ୍ତି ତେବେ ଅପରାହ୍ନ ସାଢେ ୪ଟା ସମୟରେ ପୈଠ ହୋଇଯିବ । ଦ୍ବିତୀୟ ପର୍ଯ୍ୟାୟରେ ସାଢେ ୩ଟା ପର୍ଯ୍ୟନ୍ତ କରାଯାଇଥିବା ନେଣଦେଣର ସମାଧାନ ତୁରନ୍ତ ହେବ । କହିରଖୁଛୁ ଚଳିତ ବର୍ଷ ଅକ୍ଟୋବର ସୁଦ୍ଧା ଏହି ନିୟମ ସମ୍ପୂର୍ଣ୍ଣ ଲାଗୁ ହୋଇଯିବା ଆକଳନ କରାଯାଉଛି ।
