ଭାପୁର: ପାରିବାରିକ କଳହର କରୁଣ ପରିଣତି। ୧୪ବର୍ଷର ଝିଅକୁ ପିଟିପିଟି ମାରିବା ପରେ ମଶାଣିରେ ଫିଙ୍ଗି ଦେଇଛି ସାବତ ମା’। ଏଭଳି ଅଭାନୀୟ ଘଟଣା ଘଟିଛି ନୟାଗଡ଼ ଜିଲା ବାଉଁଶବାଟି ପଞ୍ଚାୟତ ପୋଡାସାହି ଗ୍ରାମରେ। ମୃତ ନାବାଳିକା ହେଲେ ପୋଡାସାହି ଗ୍ରାମର ସୁକୁଟା ସ୍ୱାଇଁଙ୍କ ଝିଅ ତୁଳସୀ ସ୍ୱାଇଁ। ନାବାଳିକାଙ୍କ ମାମୁଁ ବ୍ରଜବନ୍ଧୁ ସ୍ୱାଇଁଙ୍କ ଅଭିଯୋଗ ପରେ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ସୂଚନା ଅନୁସାରେ ସୁକୁଟା ୨୦ ବର୍ଷ ତଳେ ଶଶୀ ସ୍ୱାଇଁଙ୍କୁ ବିବାହ କରିଥିଲେ। ତାଙ୍କର ଦୁଇଟଇ ଝିଅ ଥିବାବେଳେ ୯ବର୍ଷ ତଳେ ଶଶୀଙ୍କ ଦେହାନ୍ତ ହେବା ପରେ ସୁକୁଟା ଦ୍ୱିତୀୟ ବିବାହ କରିଥିଲେ। ନିକଟସ୍ଥ କଳପଙ୍ଗି ଗ୍ରାମର ମଣ୍ଡା ସ୍ୱାଇଁଙ୍କୁ ବିବାହ କରିଥିଲେ। ହେଲେ ପ୍ରଥମ ସ୍ତ୍ରୀଙ୍କ ବଡ ଝିଅ ତୁଳସୀକୁ ମଣ୍ଡା ନିଜ ପାଖରେ ରଖିଥିବା ବେଳେ ସାନ ଝିଅକୁ ପଡ଼ିଶା ଘରେ ରଖି ଲାଳନପାଳନ କରୁଛନ୍ତି। ହେଲେ ବୁଧବାର ସନ୍ଧ୍ୟାରେ ପାରିବାରିକ କଳହରୁ ସାବତ ମା ତୁଳସୀଙ୍କୁ ନିର୍ମମ ଭାବେ ପିଟିପିଟି ହତ୍ୟା କରିବା ପରେ ମଶାଣିରେ ଫିଙ୍ଗି ଦେଇଥିବା ମାମୁଁ ଅଭିଯୋଗ କରିଛନ୍ତି। ପୁଲିସ ଶ୍ମଶାନରେ ପହଞ୍ଚି ମୃତଦେହ ଜବତ କରି ତଦନ୍ତ ଚଳାଇଛି।
Comments are closed.