ଲାହୋର : ରକ୍ତରେ ପ୍ଲେଟଲେଟ ସଂଖ୍ୟା ବ୍ୟାପକ ହ୍ରାସ ପାଇବା କାରଣରୁ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହୋଇପଡିଛି। ୬୯ ବର୍ଷ ବୟସ୍କ ସରିଫଙ୍କୁ ଗୁରୁତର ଅବସ୍ଥାରେ ସୋମବାର ରାତିରେ କାରାଗାରରୁ ସ୍ଥାନୀୟ ସର୍ଭିସେସ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ତାଙ୍କ ରକ୍ତରେ ପ୍ଲେଟଲେଟ ପରିମାଣ ୨,୦୦୦କୁ ଖସି ଆସିଥିବା ବ୍ୟକ୍ତିଗତ ଡାକ୍ତର ଆଦନାନ ଖାନ କହିଛନ୍ତି। ଥ୍ରୋେମ୍ବାସାଇଟୋପେନିଆ (ପ୍ଲେଟଲେଟ ହ୍ରାସ) ଓ ଏନଏସଟିଏମଆଇ (ହୃଦଘାତ) ରେ ପୀଡ଼ିତ ଥିବା ବେଳେ ଏବେ ତାଙ୍କ ବୃକକର କାର୍ଯ୍ୟକରିବାର କ୍ଷମତା କମୁଛି। ଅନ୍ୟପଟେ ରକ୍ତ ଶର୍କରା ଓ ରକ୍ତ ଚାପ ସମସ୍ୟା ମଧ୍ୟ ଲାଗି ରହିଛି ବୋଲି ଆଦନାନ କହିଛନ୍ତି। ତିନିଥର ପାକିସ୍ତାନର ପ୍ରଧାନମନ୍ତ୍ରୀ ହୋଇଥିବା ସରିଫ ଶନିବାର ହୃଦଘାତର ଶିକାର ହୋଇଥିଲେ। ଇତିମଧ୍ୟରେ ସେ ୭ କିଲୋଗ୍ରାମ ଓଜନ ହରାଇଛନ୍ତି। ଚୌଧୁରୀ ସୁଗାରମିଲ ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ହୋଇ ସରିଫ କୋଟ ଲଖପତ ଜେଲରେ ବନ୍ଦୀ ଅଛନ୍ତି। ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ସରିଫଙ୍କୁ ଅଦାଲତ ୮ସପ୍ତାହ ପାଇଁ ଜାମିନ ଦେଇଛନ୍ତି।
Comments are closed.