ନର୍ଲା : ନର୍ଲା ନିକଟସ୍ଥ ଜଙ୍ଗଲକୁ ପତ୍ର ତୋଳିବାକୁ ଯାଇଥିବା ସମୟରେ ଜଣେ ଯୁବକ ଭାଲୁ ଆକ୍ରମଣର ଶିକାର ହୋଇଥିଲେ। ତେବେନିଜର ଉପସ୍ଥିତ ବୁଦ୍ଧି ଯୋଗୁ ସେ ଭାଲୁ କବଳରୁ ବଞ୍ଚି ଯାଇଛନ୍ତି। ଭାଲୁ ଆକ୍ରମଣର ଶିକାର ହୋଇଥିବା ଯୁବକଙ୍କ ପରିଚୟ ମିଳିଛି ଏବଂ ତାଙ୍କ ନାମ ଶଙ୍କର ଭୁଏ ବୋଲି ସୂଚନା ମିଳିଛି।
ଆଜି ଲାଞ୍ଜିଗଡ ବ୍ଲକ୍ କଦମଗୁଡ଼ା ପଞ୍ଚାୟତ ରେଢ଼ାପଦର ଶଙ୍କର ଭୁଏ ନିକଟସ୍ଥ ଜଙ୍ଗଲକୁ ପତ୍ର ତୋଳିବାକୁ ଯାଇଥିଲେ। ସେଠାରେ ଦୁଇଟି ବଡ଼ ଭାଲୁ ଓ ଗୋଟିଏ ଭାଲୁ ଶାବକ ମିଳିତ ଭାବେ ଶଙ୍କରଙ୍କୁ ଆକ୍ରମଣ କରିଥିଲେ। ଶଙ୍କର ଏହି ୩ଟି ଭାଲୁ ସହ ଲଢେଇ କରି ନିକଟସ୍ଥ ଏକ ଗଛ ଉପରକୁ ଚଢ଼ି ଯିବାରୁ ତାଙ୍କର ଜୀବନ ବଞ୍ଚି ଯାଇଛି। ତାଙ୍କର ସର୍ବାଙ୍ଗ ଶରୀର କ୍ଷତ ବିକ୍ଷତ ହୋଇଛି । ନର୍ଲା ଡାକ୍ତରଖାନାରେ ଚିକିତ୍ସା ପରେ ତାଙ୍କୁ ଭବାନିପାଟଣା ମୁଖ୍ୟ ଚିକିତ୍ସାଳୟକୁ ଅଧିକ ଚିକିତ୍ସା ପାଇଁ ସ୍ଥାନାନ୍ତରିତ କରାଯାଇଛି।
