ଧାମନଗର : ବୈତରଣୀ ନଦୀର ବନ୍ୟାଜଳ ଆଖୁଆପଦା ଠାରେ ବିପଦସଙ୍କେତ ଉପରେ ପ୍ରବାହିତ ହେଉଛି। ସେଠାକାର ବିପଦସଙ୍କେତ ୧୭. ୮୩ ମିଟର ଥିବା ବେଳେ ରବିବାର ଦିନ ୧୧ଟା ସୁଦ୍ଧା ତାହା ୧୭.୯୬ ମିଟରରେ ପ୍ରବାହିତ ହୋଇଛି। ଏହାର ଶାଖା ନଦୀ କୋଚିଳା ଓ ଗେଙ୍ଗୁଟୀ ନଦୀରେ ବନ୍ୟା ଜଳ ପ୍ରବେଶ କରିଛି। ଫଳରେ ଧାମନଗର ବ୍ଲକ୍ରେ ଗୌରାଙ୍ଗପୁର ଓ ମଲ୍ଲୀମାହାରରେ ବୈତରଣୀ ନଦୀର ବନ୍ୟାଜଳ ଏବଂ କନକେଇ, ଗାଇସ୍ଥଳୀ ଓ ମଠ ମାହାରାଠାରେ ଗେଙ୍ଗୁଟୀ ନଦୀର ବନ୍ୟା ଜଳ ପ୍ରବାହିତ ହେବାରେ ଲାଗିଛି। ଏହି ବନ୍ୟା ଜଳ ହଜାର ହଜାର ହେକ୍ଟର ଚାଷ ଜମିକୁ ମାଡ଼ି ଯାଇଛି । ବିଶେଷ କରି ପଧାନୀ, ସୋଇଦା, କରଦା, ଜଳାଙ୍ଗ, ଖଡ଼ିପଦା, ଆନନ୍ଦପୁର ଆଦି ପଞ୍ଚାୟତର ଚାଷ ଜମି ଜଳମଗ୍ନ ହୋଇଛି। କୋଚିଳା ଓ ଗେଙ୍ଗୁଟୀର ଜଳସ୍ତର ବୃଦ୍ଧି ଯୋଗୁ ସନ୍ଧ୍ୟା ସୁଦ୍ଧା ବିଭିନ୍ନ ଗ୍ରାମର ରାସ୍ତାରେ ବନ୍ୟାଜଳ ପ୍ରବାହିତ ହେବାର ଆଶଙ୍କା ରହିଛି। ବନ୍ୟାକୁ ନେଇ ଜିଲା ପ୍ରଶାସନ ସଜାଗ ରହିଥିବା ସହ ବୋଟ, ଚାଉଳ ମଧ୍ୟ ମହଜୁଦ ରଖାଯାଇଛି।
