ମୁଖୀଗୁଡା: କଳାହାଣ୍ଡି ଜିଲ୍ଲା ଜୟପାଟଣା ବ୍ଳକ ବଡ଼କର୍ଲାକୋଟ ନୂଆପଡାରେ ଝାଡାବାନ୍ତିରେ ଦୁଇ ଜଣଙ୍କ ମୃତ୍ୟୁ ହୋଇଥିବା ବେଳେ ୧୮ ଜଣ ଆକ୍ରାନ୍ତ ହୋଇଥିଲେ । ବର୍ତ୍ତମାନ ଆଉ ୪ ଜଣ ଝାଡାବାନ୍ତି ଆକ୍ରାନ୍ତ ହୋଇ ଚିକିତ୍ସିତ ହେଉଥିବା ଖବର ମିଳିଛି । ନୂଆପଡାର ତିଳେ ନାଏକ (୫୮), ମନ ସିଂ ପୁରିଆ(୫୫),ଜଗନ୍ନାଥ ନାଏକ(୪୫),ମାନସିଂ ସିଂ ପୂରିଆ(୪୦) ଝାଡାବାନ୍ତି ରେ ଆକ୍ରାନ୍ତ ହୋଇଛନ୍ତି । ଏନେଇ ସୋମବାର କରଲାକୋଟ ଗାଁର ନୂଆପଡାକୁ ଏକ ଡାକ୍ତରୀଦଳ ଲୋକଙ୍କୁ ଔଷଧ ବଣ୍ଟନ କରିବା ସହ ସ୍ୱାସ୍ଥ୍ୟାବସ୍ଥା ବୁଝିଥିଲେ ।
ଆଶାକର୍ମୀ ପୋଖରୀ ପାଣି ବ୍ୟବହାର କରିବା ପାଇଁ ସଚେତନ କରିଥିଲେ । ପ୍ରାଥମିକ ସୂଚନା ଅନୁଯାୟୀ ଗାଁରେ ଥିବା କୁର୍ଲ।ମୁଣ୍ଡା ସାଗରରେ ଗାଁ ଲୋକେ ଗାଧୋଇବା ସହ ଶୌଚ, ଲୁଗାପଟା ସଫା ଓ ଅଇଁଠା ବାସନକୁସନ ମଧ୍ୟ ଧୋଉଛନ୍ତି । ତେବେ ଏଥିର ପାଣି ଅପରିଷ୍କାର ହେବା ସହ ଝାଡାବାନ୍ତି ବ୍ୟାପିଥାଇ ପାରେ ବୋଲି ସ୍ୱାସ୍ଥ୍ୟ ବିଭାଗ ସନ୍ଧେହ କରୁଛି । ଗାଁରେ ଏକ ଡାକ୍ତରୀ ଟିମ ରହିବା ସହ ପ୍ରତେକ ଘରକୁ ଘର ଯାଇ ଲୋକଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝୁଛନ୍ତି । ବିଭିନ୍ନ ସ୍ଥାନରେ ସ୍ଥାନରେ ବ୍ଳଚିଙ୍ଗ ପାଉଡର ପକାଯାଇ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରାଯାଉଛି ।
ଅନ୍ୟପକ୍ଷରେ ନୂଆପଡାରେ ପରିମଳ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡିଛି । ପଡ଼ାରାସ୍ତା ଦୁଇକଡରେ ଡ୍ରେନ ନଥିବାରୁ ରାସ୍ତାରେ କାଦୁଅ ରହିବା ପାଣି ଜମି ରହୁଛି । ଲୋକେ ଶୌଚାଳୟ ବ୍ୟବହାର ନକରି ଶୌଚ ପାଇଁ କୁର୍ଲ।ମୁଣ୍ଡା ସାଗର ଉପରେ ନିର୍ଭର କରୁଛନ୍ତି । ୬୦ଘର ଏବଂ ୧୭୭ ଭୋଟର ଥିବା ନୂଆପଡାରେ ୨ଟି ନଳକୂପ ରହିଛି ଯାହା ପଡ଼ାବାସୀଙ୍କ ପାଇଁ ଯଥେଷ୍ଟ ହୋଉନାହିଁ । ନଳ କୂପ ନିକଟରେ ବାସନ ଧୋଉଥିବାରୁ ନଳକୂପ ଚାରିପାଖ ଅପରିଷ୍କାର ହେଉଛି । ଗତକାଲି ନୂଆପଡାକୁ ସଂକ୍ରାମକରୋଗ ବିଜ୍ଞାନୀ ଆସି ସ୍ଥିତି ଅନୁଧ୍ୟାନ କରିଛନ୍ତି । ସେହିପରି ସର୍ଗିଗୁଡା ପଞ୍ଚାୟତର ବାଞ୍ଜିବାହାଲରେ ଝାଡାବାନ୍ତିରେ ଜଣକର ମୃତ୍ୟୁ ହୋଇଥିବା ଜଣାପଡ଼ିଛି । ଗୋଟିଏ ପରିବାରର ୯ଜଣ ଆକ୍ରାନ୍ତ ହୋଇଥିବା ସୂଚନା ମିଳିଛି । ହେଲେ ସ୍ୱାସ୍ଥ୍ୟ ବିଭାଗ ପକ୍ଷରୁ କୌଣସି ସୂଚନା ଦିଆଯାଇନାହିଁ ।
