ମୁଖୀଗୁଡା: ଜୟପାଟଣା ବ୍ଲକ କାର୍ଯ୍ୟାଳୟ ସମ୍ମିଳନୀ କକ୍ଷରେ ଗତକାଲି (ସୋମବାର) କଳାହାଣ୍ଡି ଜିଲ୍ଳାପାଳଙ୍କ ଅଭିଯୋଗ ଶୁଣାଣି ଶିବିର ଅନୁଷ୍ଠିତ ହୋଇଥିଲା ।ଏଥିରେ କଳାହାଣ୍ଡି ଜିଲ୍ଲାପାଳ ପି. ଅନ୍ଵେଷା ରେଡ୍ଡୀ, କଳାହାଣ୍ଡି ଏସ.ପି ଶ୍ରୀ ଅଭିଳାଷ ଜି, ଜୟପାଟଣା ବିଡିଓ ପ୍ରଣବ ପ୍ରକାଶ ଚାନ୍ଦ, ପିଡ଼ିଡିଆରଡିଏ ଏବଂ ଅନ୍ୟ ଜିଲ୍ଲାସ୍ତରୀୟ ଅଧିକାରୀ ଉପସ୍ଥିତ ଥିଲେ । ଜୟପାଟଣା ବ୍ଲକର ବିଭିନ୍ନ ଅଞ୍ଚଳର ୧୭୦ଜଣ ଅଭିଯୋଗ କରିଥିଲେ । ଜୟପାଟଣାକୁ ପାନୀୟ ଜଳଯୋଗାଣ ସମ୍ପର୍କିତ ଅଭିଯୋଗ ଜୟପାଟଣା ସରପଞ୍ଚ ଏବଂ ସମିତି ସଭ୍ୟା କରିଥିଲେ ।
ହରିଶ୍ଚନ୍ଦ୍ର ଯୋଜନା ଏବଂ ଜୟପାଟଣା ଡାକ୍ତରଖାନାରେ ବିଶେଷଜ୍ଞ ପଦବୀ ପୂରଣ ପାଇଁ ଜିଲ୍ଳାପାଳଙ୍କୁ ଜୟପାଟଣା ସମିତି ସଭ୍ୟା ରଶ୍ମିତା ଦୂରିଆ ଜଣାଇଥିଲେ । ପିପଲଗୁଡା ଗ୍ରାମର ଶଙ୍କର ଧଙ୍ଗଡାମାଝୀ ତାଙ୍କ ନାଁରେ ଆସିଥିବା ପ୍ରଧାନମନ୍ତ୍ରୀ ଆବାସ ଅନ୍ୟ କାହାରିକୁ ଦିଆଯାଇଥିବା ସମ୍ପର୍କରେ ଅଭିଯୋଗ କରିଥିଲେ । ଶିବିର ଦିନ ୧ଟାରେ ସରିଯାଇଥିବା ବେଳେ ପରେ ଆସିଥିବା ବହୁ ଅଭିଯୋଗକାରୀ ସେମାନଙ୍କ ଅଭିଯୋଗ କରିନପାରି ନିରାଶରେ ଫେରି ଯାଇଥିଲେ । ହେଲେ ଜୟପାଟଣା ବିଡିଓ ଅଫିସ ସମୟରେ ନିଜ ପ୍ରକୋଷ୍ଠରେ ନରହି ସରକାରୀ ବାସଭବନରେ ରହୁଥିବାରୁ ଜନସାଧାରଣ ଅସୁବିଧାର ସମ୍ମୁଖିନ ହେଉଥିବା ଜଣେ ବ୍ୟକ୍ତିଙ୍କ ଅଭିଯୋଗ ଚର୍ଚ୍ଚାର ପରିସରକୁ ଆସିଥିଲା । ପ୍ରଚାର ପ୍ରସାର ଅଭାବ ଯୋଗୁଁ ବହୁ ଜନସାଧାରଣ ଅଭିଯୋଗ ଶୁଣାଣି ଶିବିରକୁ ଆସିପାରି ନଥିଲେ ।
