ପ୍ରଧାନମନ୍ତ୍ରୀଙ୍କ ବାତ୍ୟା ସମୀକ୍ଷା ବୈଠକରେ ଯୋଗ ନ ଦେବା ନେଇ ମମତା ବାନାର୍ଜୀ ଯେଉଁ ସଫେଇ ଦେଇଥିଲେ ତାହାର ଜବାବ ରଖିଛି କେନ୍ଦ୍ର। ବୈଠକରେ ବିଳମ୍ବରେ ପହଞ୍ଚିବା ଓ ମାତ୍ର ୨୫ ମିନିଟ ରହି ପଳାଇ ଆସିବା ବାବଦରେ ମମତା କହିଥିଲେ ଯେ ଏ ସଂକ୍ରାନ୍ତରେ ସେ ପ୍ରଧାନମନ୍ତ୍ରୀଙ୍କ ଅନୁମତି ନେଇଥିଲେ। ପ୍ରଧାନମନ୍ତ୍ରୀଙ୍କ ସହ କଥାହୋଇ ଫେରିବା ପୂର୍ବରୁ ସେ ଏଥିପାଇଁ ତିନି ଥର ଅନୁମତି ନେଇଥିଲେ ବୋଲି କହିଥିଲେ। କେନ୍ଦ୍ର ସରକାର ମଙ୍ଗଳବାର ଏହାକୁ ‘ମିଛ’ ବୋଲି ଦର୍ଶାଇଛନ୍ତି। ସମ୍ପୂର୍ଣ୍ଣ ଘଟଣା ବିଷୟରେ ବର୍ଣ୍ଣନା ପୂର୍ବକ କେନ୍ଦ୍ର ସରକାର ୯ ଧାରା ବିଶିଷ୍ଟ ପ୍ରତିବାଦ ପତ୍ର ପ୍ରକାଶ କରିଛନ୍ତି।
ବାତ୍ୟା ପରେ ଏହାର କ୍ଷୟକ୍ଷତି ସମୀକ୍ଷା ବୈଠକ ପାଇଁ ପୂର୍ବରୁ ମମତାଙ୍କୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଅବଗତ କରାଯାଇଥିଲା। ମମତାଙ୍କୁ ଚାଲିଯିବା ପାଇଁ ପ୍ରଧାନମନ୍ତ୍ରୀ ଆଦୌ ଅନୁମତି ଦେଇ ନ ଥିଲେ; ବରଂ ସେ ବୈଠକ ବର୍ଜନ କରି ଚାଲିଯାଇଥିଲେ। ପ୍ରଧାନମନ୍ତ୍ରୀଙ୍କୁ ଭେଟିବା ପାଇଁ ତାଙ୍କୁ ଅପେକ୍ଷା କରିବାକୁ ପଡ଼ିଥିଲା ବୋଲି ମମତା ଯାହା କହୁଛନ୍ତି ତାହା ମଧ୍ୟ ମିଛ। ମୋଦୀ କଲାଇକୁଣ୍ଡାରେ ୧.୫୯ରେ ପହଞ୍ଚିଥିଲେ; କିନ୍ତୁ ମମତା ୨.୧୦ରେ ପହଞ୍ଚିଥିଲେ। ବିମାନ ଅବତରଣ ସ୍ଥାନରୁ ବୈଠକ ସ୍ଥଳ ମାତ୍ର ୫୦୦ମିଟର ଦୂର। ମମତା ପ୍ରଧାନମନ୍ତ୍ରୀଙ୍କ ପ୍ରତି ନୈତିକ ସମ୍ମାନ ମଧ୍ୟ ପ୍ରଦର୍ଶନ କରି ନ ଥିଲେ। ମମତା ବୈଠକରେ ଯୋଗଦେବାର ଥିଲା; କିନ୍ତୁ ଶୁଭେନ୍ଦୁ ଅଧିକାରୀଙ୍କ ଉପସ୍ଥିତି ଯୋଗୁଁ ସେ ମନ ପରିବର୍ତ୍ତନ କରିଥିବା ପ୍ରକାଶ। ମୁଖ୍ୟ ଶାସନ ସଚିବ ମଧ୍ୟ ନିଜର ସାମ୍ବିଧାନିକ କର୍ତ୍ତବ୍ୟ କରି ନାହାନ୍ତ ବୋଲି କେନ୍ଦ୍ର ସରକାର ଦର୍ଶାଇଛନ୍ତି।
