ପିପିଲି: ପ୍ରଖ୍ୟାତ ସାହିତ୍ୟିକା, ସମାଜସେବିକା, ଶ୍ରୀଜଗନ୍ନାଥ ସଂସ୍କୃତି ଓ ଚେତନାର ସାବଲୀୟ ଓ ଲାଳିତ୍ୟ ଭାଷ୍ୟକାର, ସୁବକ୍ତା, ଲୋକସେବକ ମଣ୍ଡଳର ପ୍ରାକ୍ତନ ଆଜୀବନ ସଦସ୍ୟା ତଥା ‘ସମାଜ’ର ପ୍ରାକ୍ତନ କାର୍ଯ୍ୟକାରୀ ସଂପାଦିକା ପ୍ରଫେସର ଡକ୍ଟର ମନୋରମା ମହାପାତ୍ରଙ୍କ ବିୟୋଗରେ ପୁରୀ ଜିଲାର ଅଗ୍ରଣୀ ନାଗରିକ ସଂଗଠନ ଜନସ୍ୱାର୍ଥ ସୁରକ୍ଷା ସମିତି ପକ୍ଷରୁ ଗଭୀର ଶୋକ ପ୍ରକାଶ କରାଯାଇଛି। ସମିତିର ମୁଖ୍ୟ ସଂଯୋଜକ ଶିକ୍ଷାବିତ୍ ସନ୍ତୋଷ କୁମାର ମିଶ୍ରଙ୍କ ଅଧ୍ୟକ୍ଷତାରେ ଦାଣ୍ଡମୁକୁନ୍ଦପୁର ଠାରେ ଅନୁଷ୍ଠିତ ଶୋକସଭାରେ ସମାଜସେବୀ ନୃସିଂହ ସାହୁ, ଶଙ୍କର୍ଷଣ ପ୍ରଧାନ, ବ୍ରଜକିଶୋର ପ୍ରଧାନ, ଶ୍ରୀଧର ନାୟକ, ସ୍ୱରାଜ୍ୟ ରଥ, ବ୍ରହ୍ମାନନ୍ଦ ପ୍ରଧାନ, ମହେଶ୍ୱର ମାଝୀ ପ୍ରମୁଖ ଯୋଗଦେଇ ଦିବଂଗତ ଆତ୍ମାର ସଦ୍ଗତି କାମନା କରିବା ସହିତ ତାଙ୍କ ଶୋକସନ୍ତପ୍ତ ପରିବାରକୁ ସମବେଦନା ଜ୍ଞାପନ କରିଥିଲେ। ଜନସ୍ୱାର୍ଥ ସୁରକ୍ଷା ସମିତି ସହ ସ୍ୱର୍ଗତ ମହାପାତ୍ରଙ୍କ ସଂପର୍କ ଦୀର୍ଘଦିନର। ଗୋପବନ୍ଧୁ ଜୟନ୍ତୀରେ ସତ୍ୟବାଦୀରୁ ସୁଆଣ୍ଡୋ ପଦଯାତ୍ରା, ଦାଣ୍ଡମୁକୁନ୍ଦପୁର ସ୍ଥିତ ଗୋପବନ୍ଧୁ ମେମୋରିଆଲ ହାଇସ୍କୁଲ ସମେତ ପିପିଲି ଅଞ୍ଚଳର ବିଭିନ୍ନ ସାମାଜିକ କାର୍ଯ୍ୟକ୍ରମରେ ଶ୍ରୀମତୀ ମହାପାତ୍ରଙ୍କ ଯୋଗଦାନ ସବୁବେଳେ ସ୍ମରଣୀୟ ହୋଇ ରହିବ ବୋଲି ସନ୍ତୋଷ କୁମାର ମିଶ୍ର ପ୍ରକାଶ କରିଥିଲେ।
Comments are closed.