ସମାଜ ଡିଜିଟାଲ ଡେସ୍କ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଇଣ୍ଡି ମେଣ୍ଟର ମଙ୍ଗ ଧରିବାକୁ ଇଚ୍ଛୁକ ଥିବା ନେଇ ପ୍ରକାଶ କରିବା ପରେ ରାଜନୈତିକ ହଟଚମଟ ସୃଷ୍ଟି ହୋଇଛି। ଇଣ୍ଡି ମେଣ୍ଟର ପ୍ରମୁଖ ସହଯୋଗୀ କଂଗ୍ରେସ, ଆରଜେଡି, ସମାଜବାଦୀ ପାର୍ଟି ଏବଂ ଶିବସେନା ୟୁବିଟି ନେତାମାନେ ମମତାଙ୍କ ମନ୍ତବ୍ୟ ଉପରେ ନିଜ ନିଜ ପ୍ରତିକ୍ରିୟା ପ୍ରକାଶ କରିଛନ୍ତି। କଂଗ୍ରେସ ସାଂସଦ ଇମରାନ ମସୁଦ କହିଛନ୍ତି ଯେ, ମମତା ଜଣେ ବଡ଼ ନେତା। କିନ୍ତୁ ରାହୁଲ ଗାନ୍ଧୀଙ୍କ ବ୍ୟତୀତ ଅନ୍ୟ କେହି ଦେଶର ନେତୃତ୍ଵ ନେବାର ସ୍ଥିତିରେ ନାହାନ୍ତି।
ଟିଏମସି ମୁଖ୍ୟ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ଗତ ଶୁକ୍ରବାର ଇଣ୍ଡି ମେଣ୍ଟର ନେତୃତ୍ଵ ନେବା କଥା କହିଥିଲେ। ନିକଟରେ ହୋଇଥିବା ନିର୍ବାଚନଗୁଡ଼ିକରେ ମେଣ୍ଟର ପ୍ରଦର୍ଶନ ଉପରେ ସେ ନିରାଶା ବ୍ୟକ୍ତ କରିବା ସହିତ ନିଜେ ମଙ୍ଗ ଧରିବାକୁ ପ୍ରସ୍ତୁତ ଥିବା କହିଥିଲେ।
ମମତାଙ୍କ ଏପରି ମନ୍ତବ୍ୟ ପରେ କଂଗ୍ରେସ ସାଂସଦ ବର୍ଷା ଗାଏକଓ୍ବାଡ କହିଛନ୍ତି, ମମତାଙ୍କୁ ଏପରି ଲାଗୁଛି, କିନ୍ତୁ ଆମକୁ ସେପରି କିଛି ଲାଗୁନାହିଁ। ଆଲୋଚନା କରିବା। ତାଙ୍କ କଥାରେ ତାଙ୍କ ଦଳ ଚାଲୁଛି। ଆମେ ତ କଂଗ୍ରେସ କଥାରେ ଚାଲୁଛୁ।
ଅନ୍ୟପଟେ ବାମଦଳ ବି କଂଗ୍ରେସ ଉପରେ ପ୍ରଶ୍ନ ଉଠାଇଛି। ବାମ ଦଳ ନେତା ଡି. ରାଜା କହିଛନ୍ତି, କଂଗ୍ରେସକୁ ଆତ୍ମଚିନ୍ତନ କରିବା ଜରୁରୀ। ବର୍ତ୍ତମାନର ପରିସ୍ଥିତିରେ ଇଣ୍ଡି ମେଣ୍ଟର ବୈଠକ ହେବା ଜରୁରୀ। ହରିୟାଣା ଏବଂ ମହାରାଷ୍ଟ୍ର ନିର୍ବାଚନରେ କଂଗ୍ରେସ ମେଣ୍ଟର ସହଯୋଗୀ ଦଳଗୁଡ଼ିକ କଥା ଶୁଣିଲା ନାହିଁ। ସହଯୋଗୀ ଦଳଗୁଡ଼ିକର କଥା ଶୁଣିଥିଲେ ଲୋକସଭା ଏବଂ ହରିୟାଣା-ମହାରାଷ୍ଟ୍ର ନିର୍ବାଚନର ଫଳାଫଳ ଭିନ୍ନ ହୋଇଥାଆନ୍ତା।
Comments are closed.