କୋଲକାତା : ପାଖେଇ ଆସୁଛି ଲୋକସଭା ନିର୍ବାଚନ । ଦେଶର ସବୁ ରାଜ୍ୟର ରାଜନୀତିରେ ଛୋଟ ବଡ ଅଦଳ ବଦଳ ଦେଖିବାକୁ ମିଳୁଛି । ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନ୍ ଗିରଫ ହୋଇସାରିଛନ୍ତି । ବିହାରରେ ମହାମେଣ୍ଟର ସରକାର ଗଲାପରେ ସେଠାରେ ଏବେ ଏନଡିଏ ସରକାର ଅଛି । ଦିଲ୍ଲୀରେ ମଧ୍ୟ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଇଡି ମାମଲାରେ ଚିନ୍ତାରେ ଅଛନ୍ତି । ସେହିଭଳି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଜି କୋଲକାତାରେ ଧାରଣା ପ୍ରଦର୍ଶନ କରିବେ ।
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କେନ୍ଦ୍ର ଦ୍ବାରା ରାଜ୍ୟର ବକେୟା ରୋକିବାକୁ ବିରୋଧ କରି ଶୁକ୍ରବାର ଧାରଣା ଦେବେ । କେନ୍ଦ୍ର ଦ୍ବାରା ବିଶେଷ ରୂପେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ରୋଜଗାର ଗ୍ୟାରେଣ୍ଟି ଅଧିନିୟମ(ମନରେଗା) ଅନୁସାରେ ବକେୟାର ରାଶି ରୋକାଯିବା ମୁଦ୍ଦାକୁ ନେଇ ରାଜ୍ୟର ଏକ ବଡ ରାଜନୈତିକ ବିବାଦ ଦେଖାଦେଇଛି । ତୃଣମୂଳ କଂଗ୍ରେସର ଜଣେ ବରିଷ୍ଠ ନେତା କହିଛନ୍ତି କି ଧାରଣା ଅପରାହ୍ନ ୧ଟାରୁ ରେଡ୍ ରୋଡ୍ ଅଞ୍ଚଳରେ ଥିବା ମଇଦାନରେ ହେବ । ପାର୍ଟି ପ୍ରମୁଖ ମମତା ବାନାର୍ଜୀ ବିରୋଧ ପ୍ରଦର୍ଶନର ନେତୃତ୍ବ ନେବେ । ପାର୍ଟିର ଅନ୍ୟ ବରିଷ୍ଠ ନେତାମାନେ ମଧ୍ୟ ସେଠାରେ ଉପସ୍ଥିତ ରହିବେ ।
ଏହା ପୂର୍ବରୁ ତୃଣମୂଳର ଜାତୀୟ ମହାସଚିବ ଅଭିଷେକ ବାନାର୍ଜୀ ପାର୍ଟି ବିଧାୟକ, ସାଂସଦ, ମନ୍ତ୍ରୀ ଏବଂ ମନରେଗା କର୍ମୀଙ୍କ ଏକ ଦଳ ନୂଆ ଦିଲ୍ଲୀ ଜନ୍ତର ମନ୍ତରରେ ପ୍ରଦର୍ଶନ କରିଥିଲେ ଏବଂ ଏଠାରେ ରାଜଭବନ ବାହାର ୫ ଦିନ ପର୍ଯ୍ୟନ୍ତ ଧାରଣା ଦେଇଥିଲେ । ବାନାର୍ଜୀଙ୍କ ନେତୃତ୍ବରେ ଗତ ବର୍ଷ ମାର୍ଚ୍ଚରେ ମଧ୍ୟ ଏହି ଭଳି ଦୁଇ ଦିବସୀୟ ଧାରଣା ଦିଆଯାଇଥିଲା ।
