ସତନା : ମଧ୍ୟପ୍ରଦେଶ ସତନା ଜିଲାର ଚିତ୍ରକୂଟରୁ ଫେବୃଆରୀ ୧୨ରେ ଅପହୃତ ଯାଆଁଳା ଭାଇ ଶ୍ରୀୟାଁଶ ଏବ ପ୍ରିୟାଁଶଙ୍କ ମୃତଦେହ ଉଦ୍ଧାର କରାଯାଇଛି। ଉତ୍ତରପ୍ରଦେଶ ବାନ୍ଧାର ଯମୁନା ନଦୀରୁ ଶନିବାର ହାତ, ଗୋଡ଼ ବନ୍ଧା ଅବସ୍ଥାରେ ଦୁଇ ଭାଇଙ୍କ ଶବ ମିଳିଛି। ଅପହରଣକାରୀମାନେ ୨୦ ଲକ୍ଷ ଟଙ୍କା ନେବା ପରେ ବି ପିଲା ଦ୍ୱୟଙ୍କୁ ହତ୍ୟା କରିଛନ୍ତି ବୋଲି ପରିବାର ଲୋକେ ଅଭିଯୋଗ କରିଛନ୍ତି।
ପୁଲିସ୍ ସୂଚନା ଅନୁସାରେ ଅପହରଣକାରୀ ଦୁଇ କୋଟି ଟଙ୍କା ମାଗିଥିଲେ। ଘରଲୋକେ ୨୦ ଲକ୍ଷ ଟଙ୍କା ଦେଇ ସାରିଥିଲେ। ଏହି ଘଟଣାରେ ପୁଲିସ୍ ୬ ଜଣଙ୍କୁ ଗିରଫ କରିଛି। ମାମଲାକୁ ନେଇ ଦୁଇ ରାଜ୍ୟରେ ରାଜନୈତିକ ଅଭିଯୋଗ-ପ୍ରତିଅଭିଯୋଗ ଆରମ୍ଭ ହୋଇଯାଇଛି। ଅପହୃତ ଯାଅାଁଳା ଭାଇଙ୍କୁ ହତ୍ୟା ନେଇ ଖବର ମିଳିବା ପରେ ଚିତ୍ରକୂଟରେ ଶୋକାକୂଳ ପରିବେଶ ସୃଷ୍ଟି ହୋଇଛି। ଉତ୍ତ୍ୟକ୍ତ ଲୋକମାନେ କେତେକ ସ୍ଥାନରେ ଭଙ୍ଗାରୁଜା କରିଛନ୍ତି।
ମୃତ ଯାଅାଁଳା ଭାଇଙ୍କ ବୟସ ୬ ବର୍ଷ ଲେଖାଏଁ ଥିଲା। ସେମାନଙ୍କ ଘର ଉତ୍ତରପ୍ରଦେଶର ରାମଘାଟରେ। ତାଙ୍କ ବାପା ବ୍ରିଜେଶ ରାୱତ ଜଣେ ତେଲ ବ୍ୟବସାୟୀ। ଶିଶୁ ଦ୍ୱୟ ମଧ୍ୟପ୍ରଦେଶ ଚିତ୍ରକୂଟସ୍ଥିତ ଏକ ସ୍କୁଲରେ ପଢୁଥିଲେ। ଘଟଣା ଦିନ ଶିଶୁ ଦ୍ୱୟ ସ୍କୁଲରୁ ବସ୍ ଯୋଗେ ଘରକୁ ଫେରୁଥିବାବେଳେ ମୁଖା ପିନ୍ଧା ଦୁଇ ଜଣ ଯୁବକ ବନ୍ଧୁକ ଦେଖାଇ ବସ୍କୁ ଅଟକାଇଥିଲେ। ସେଠାରୁ ସେମାନେ ଶିଶୁ ଦ୍ୱୟଙ୍କୁ ଅପହରଣ କରିନେଇଥିଲେ। ଶିଶୁ ଦ୍ୱୟଙ୍କୁ ମୁକୁଳାଇବା ପାଇଁ ସେମାନେ ୨ କୋଟି ଟଙ୍କା ମାଗିଥିଲେ।
