ସମାଜ ପୋର୍ଟାଲ ଡେସ୍କ: ଦିଲ୍ଲୀ ସ୍ୱାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ କହିଛନ୍ତି ଯେ କରୋନା ସଂକ୍ରମଣ ରୋକିବା ପାଇଁ ସତର୍କତା ପଦକ୍ଷେପ ସ୍ୱରୂପ ଲାଗୁ ହୋଇଥିବା ଲକଡାଉନର ଅବଧି ଦିଲ୍ଲୀରେ ଆଉ ବୃଦ୍ଧି କରାଯିବ ନାହିଁ। କରୋନା ଭାଇରସ୍ ମାମଲାରେ ଦିଲ୍ଲୀରେ ଆଉ ଅଧିକ ସମୟ ପାଇଁ ଲକଡାଉନ ଅବଧି ବୃଦ୍ଧି କରିବା ନେଇ ଆଲୋଚନା ହୋଇଛି କି ନାହିଁ ବୋଲି ସାମ୍ବାଦିକମାନଙ୍କ ପ୍ରଶ୍ନର ଜବାବ ଦେବା ଅବସରରେ ସତ୍ୟେନ୍ଦ୍ର କହିଛନ୍ତି ଯେ ଦିଲ୍ଲୀରେ ଆଉ ଲକ ଡାଉନ ଅବଧି ବୃଦ୍ଧି କରାଯିବ ନାହିଁ।
ଦିଲ୍ଲୀରେ ୩୪ ହଜାରରୁ ଅଧିକ କରୋନା ସଂକ୍ରମିତ ରହିଥିବା ବେଳେ ଏଯାବତ ୧ହଜାର ୮୫ ଜଣଙ୍କର ମୃତ୍ୟୁ ଘଟିଛି। ଦିଲ୍ଲୀରେ ୨ ହଜାର ୯୮ ଜଣଙ୍କର କରୋନା ଜନିତ ମୃତ୍ୟୁ ହୋଇଥିବା ଦିଲ୍ଲୀ ମୁନିସିପାଲ କର୍ପୋରେସନ ଦାବି କରୁଥିବା ପ୍ରସଙ୍ଗରେ ସତ୍ୟେନ୍ଦ୍ର କହିଛନ୍ତି ଯେ ସେମାନେ କାହିଁକି ଆମକୁ ସେହି ବିବରଣୀ ପଠାଉ ନାହାଁନ୍ତି? ନାମ, ବୟସ ଏବଂ ରିପୋର୍ଟ ଭଳି ସମସ୍ତ ବିବରଣୀ ଆବଶ୍ୟକ। ଏହି ସଂଖ୍ୟାଗୁଡିକର ତାଲିକା ପାଇଁ ସେମାନଙ୍କୁ ପଚାରନ୍ତୁ। ସେହି ଲୋକଙ୍କ କରୋନା ପଜିଟିଭ ରିପୋର୍ଟ ମଧ୍ୟ ପଠାନ୍ତୁ ।
ଦେଶରେ ମୋଟ କରୋନା ସଂକ୍ରମଣ ମାମଲା ବର୍ତ୍ତମାନ ୨ ଲକ୍ଷ ୯୭ ହଜାର ୫୩୫ରେ ପହଞ୍ଚିଛି, ଯେଉଁଥିରେ ୧ ଲକ୍ଷ ୪୧ ହଜାର ୮୪୨ଟି ସକ୍ରିୟ ମାମଲା ରହିଥିବା ବେଳେ ୧ ଲକ୍ଷ ୪୭ ହଜାର ୧୯୫ ଜଣ ହୋଇଛନ୍ତି ଏବଂ ୮ ହଜାର ୪୯୮ ଜଣଙ୍କର ମୃତ୍ୟୁ ଘଟିଛି। ସେହିପରି ମହାରାଷ୍ଟ୍ରରେ ୯୭ ହଜାର ୬୪୮ ଜଣ ସଂକ୍ରମିତ ହୋଇଥିବା ବେଳେ ତାମିଲନାଡୁରେ କରୋନା ଆକ୍ରାନ୍ତ ସଂଖ୍ୟା ୩୮ ହଜାର ୭୧୬ ଓ ଦିଲ୍ଲୀରେ ୩୪ ହଜାର ୬୮୭ଟି ସଂକ୍ରମଣ ରହିଛି।
