ନାସିକ: ଶୁକ୍ରବାର ମହାରାଷ୍ଟ୍ରର ନାସିକଠାରେ ହିନ୍ଦୁସ୍ଥାନ ଏରୋନଟିକ୍ସ ପ୍ରାଇଭେଟ ଲିମିଟେଡ ପକ୍ଷରୁ ଭାରତୀୟ ବାୟୁସେନା ପାଇଁ ନିର୍ମିତ ତେଜସ୍ ଏମକେ୧ଏ ଯୁଦ୍ଧ ବିମାନର ଉଡାଣକୁ ସଫଳତାର ସହ ପରୀକ୍ଷଣ କରାଯାଇଛି। ଏହି ଉତ୍ସବରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଉପସ୍ଥିତ ଥିଲେ। ପ୍ରଥମ ଉଡାଣ ସଫଳ ହେବାପରେ ତେଜସ୍ ଏମକେ୧ଏ ବିମାନକୁ ପାରମ୍ପରିକ ଜଳ ସଲାମି ଦିଆଯାଇଥିଲା। ଏହି ଅବସରରେ ରାଜନାଥ ସିଂହ ହାଲୁକା ଯୁଦ୍ଧ ବିମାନ ତେଜସ୍ ଏମକେ୧ଏ ପାଇଁ ନାସିକସ୍ଥିତ ହିନ୍ଦୁସ୍ଥାନ ଏରୋନଟିକ୍ସର ତୃତୀୟ ପ୍ରଡକ୍ସନ ଲାଇନ ଏବଂ ହିନ୍ଦୁସ୍ଥାନ ଟର୍ବୋ ଟ୍ରେନର-୪୦ ବିମାନର ଦ୍ବିତୀୟ ପ୍ରଡକ୍ସନ ଲାଇନକୁ ଉଦ୍ଘାଟନ କରିଛନ୍ତି। ତେଜସ୍ ଏମକେ୧ଏ ଯୁଦ୍ଧ ବିମାନ ସାମିଲ ହେବାପରେ ଭାରତୀୟ ବାୟୁସେନାର ମାରକ କ୍ଷମତା ବୃଦ୍ଧି ପାଇବା ସହ ଚୀନ ଓ ପାକିସ୍ତାନ ବାୟୁସେନା ପକ୍ଷରୁ ଆସନ୍ନ ବିପଦର ଉଚିତ ମୁକାବିଲା କରିବ ବୋଲି ଆଶା କରାଯାଉଛି। ଚୀନ୍ ନିର୍ମିତ ଜେ-୧୭ ବିମାନ ତୁଳନାରେ ତେଜସ୍ ଏମକେ୧ଏର ରେଡାର ଦକ୍ଷତା ଅଧିକ ଉନ୍ନତ ଥିବାବେଳେ ଏହା ଏକାଧିକ ସାମରିକ ଅଭିଯାନକୁ ସଫଳ କରିପାରିବ।
ଏଥିରେ ଖଞ୍ଜାଯାଇଥିବା ଅତ୍ୟାଧୁନିକ ବୈଦ୍ୟୁତିକ ଯନ୍ତ୍ରପାତି ଯୁଦ୍ଧକ୍ଷେତ୍ରରେ ଭାରତକୁ ଆଗୁଆ ରଖିପାରିବ। ଭାରତୀୟ ବାୟୁସେନା ଇତିମଧ୍ୟରେ ମିଗ୍-୨୧ ବିମାନକୁ ସେବା ନିବୃତ୍ତ କରିସାରିଥିବାରୁ ତେଜସ୍ ଏମକେ୧ଏ ବିମାନ ଏହାର ସ୍ଥାନ ପୂରଣ କରିବ ବୋଲି ଆଶା କରାଯାଉଛି। ଆକାଶରେ ଏହି ବିମାନ ଇନ୍ଧନ ଭର୍ତ୍ତି କରିବାର ସୁବିଧା ମଧ୍ୟ ରହିଛି। ହିନ୍ଦୁସ୍ଥାନ ଏରୋନଟିକ୍ସର ତୃତୀୟ ପ୍ରଡକ୍ସନ ଲାଇନ କାର୍ଯ୍ୟକ୍ଷମ ହେବାଫଳରେ ବାର୍ଷିକ ୧୬ରୁ ୨୪ଟି ତେଜସ୍ ବିମାନ ଉତ୍ପାଦିତ ହୋଇପାରିବ।
