ପାତ୍ରପୁରରେ ଆଇନ ସଚେତନତା କାର୍ଯ୍ୟକ୍ରମ

ପାତ୍ରପୁର : ପାତ୍ରପୁର ତାଲୁକ ଆଇନ ସେବା କମିଟି ତରଫରୁ ମଙ୍ଗଳବାର ପାତ୍ରପୁର ବ୍ଲକ ପରିସରରେ ଏକ ଆଇନ ସଚେତନତା କାର୍ଯ୍ୟକ୍ରମ କମିଟିର ଅଧ୍ୟକ୍ଷ ତଥା ପାତ୍ରପୁର ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ ଶ୍ରୀମତୀ କୃଷ୍ଣା ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଜାତିଗତ ଆକ୍ଷେପ ଆଇନ ଏବଂ କର୍ମକ୍ଷେତ୍ରରେ ମହିଳାଙ୍କୁ ଯୌନ ଉତ୍ପୀଡ଼ନ ଆଇନ ବିଷୟରେ ଭାରତୀୟ ଆଇନ ବ୍ୟବସ୍ଥାରେ ରହିଥିବା ସରକାରୀ ନିୟମ ଓ ଦଣ୍ଡ ବିଧାନ ନେଇ ଉପସ୍ଥିତ ମହିଳା ମାନଙ୍କୁ ସଚେତନ କରାଯାଇଥିଲା । ମାଜିଷ୍ଟ୍ରେଟ ଶ୍ରୀମତୀ ମିଶ୍ର ଉପସ୍ଥିତ ମହିଳାଙ୍କୁ କୌଣସି ଆଇନଗତ ସମସ୍ୟା ଦେଖାଦେଲେ କାହା ଚାପରେ ଚୁପ ନରହି ଆଇନର ଆଶ୍ରୟ ନେବାକୁ ଆହ୍ୱାନ ଦେଇଥିଲେ । ପାତ୍ରପୁର କୋର୍ଟର ବରିଷ୍ଠ ଆଇନଜୀବୀ ପ୍ରଫୁଲ୍ଲ ପ୍ରଧାନ ଓ ସୁଦର୍ଶନ ପାତ୍ର ଜାତିଗତ ଆକ୍ଷେପ ଏବଂ କର୍ମକ୍ଷେତ୍ରରେ ମହିଳାଙ୍କ ଉତ୍ପୀଡ଼ନ ଆଇନ ସମ୍ପର୍କରେ ପ୍ରାଞ୍ଜଳ ଭାବରେ କହିଥିଲେ ।  ପାତ୍ରପୁର ବିଡ଼ିଓ ଲକ୍ଷ୍ମଣ ସୋରେନ ଉପସ୍ଥିତ ମହିଳାଙ୍କୁ ନିଜେ ଏଥି ପ୍ରତି ସଚେତନ ହୋଇ ଅନ୍ୟକୁ ସଚେତନ କରିବାକୁ ବୋଲି ପରାମର୍ଶ ଦେଇଥିଲେ । ଆଇନଜୀବୀ ଲମ୍ବୋଦର ପ୍ରଧାନ ଧନ୍ୟବାଦ ଅର୍ପଣ କରିଥିବା ବେଳେ  ପାତ୍ରପୁର ବ୍ଲକ ଓ କୋର୍ଟ କର୍ମଚାରୀ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।