ଲଡୁଗାଁ : ଓଡ଼ିଆରୁ ଇଂରାଜୀ ହେଉ କି ଇଂରାଜୀରୁ ଓଡ଼ିଆ। ମନଇଚ୍ଛା ଅନୁବାଦ କରିବାରେ ଏମାନେ ସିଦ୍ଧହସ୍ତ। ଓଡ଼ିଆ ଭାଷାକୁ ତ ଏମାନେ ଏ ଯାଏ ସରକାରୀ କଳର ଭାଷା ଭାବେ ବ୍ୟବହାର କରିପାରିଲେନି ବରଂ ଭାଷାକୁ ବିକୃତ କରିବାର କୌଣସି ସୁଯୋଗକୁ ହାତଛଡ଼ା କରନ୍ତି ନାହିଁ। କିଛି ଦିନ ତଳେ କଳାହାଣ୍ଡି ଜିଲା ଲଡୁଗାଁ ପଞ୍ଚାୟତ ଘନାଗୁଡା ସରକାରୀ ପ୍ରାଥମିକ ବିଦ୍ୟାଳୟରେ ମଦ୍ୟପ ଶିକ୍ଷକଙ୍କ ଭିଡିଓ ଭାଇରାଲ୍ ଘଟଣା ଖବର ପ୍ରକାଶ ପାଇଥିଲା। ଏ ନେଇ କୋକସରା ଗୋଷ୍ଠୀ ଶିକ୍ଷା ବିଭାଗରୁ ଅଧିକାରୀମାନେ ତଦନ୍ତ କଲେ । ଶିକ୍ଷାଦାନରେ ଅବହେଳା ଯୋଗୁଁ ସହକାରୀ ଶିକ୍ଷକ ଭୋଜରାଜ ଶବରକୁ ନିଲମ୍ବିତ କରାଯିବା ପାଇଁ ଏକ ନୋଟିସ୍ ଜାରି କରାଗଲା। ହେଲେ କୋକସରା ଗୋଷ୍ଠୀ ଶିକ୍ଷା ବିଭାଗ ଦ୍ବାରା ଜାରି ହୋଇଥିବା ନୋଟିସରେ ଓଡ଼ିଆ ଭାଷା ଅତ୍ୟନ୍ତ ବିକୃତ ଭାବେ ଛପାଯାଇଥିବା ଦେଖିବାକୁ ମିଳିଥିଲା । ଓଡ଼ିଆ ଲେଖା ଏମିତି ବିକୃତ ହୋଇଛି ଯେ ସବୁ ମାତ୍ରା ଏପଟ ସେପଟ । ନୋଟିସରେ ଲେଖାଥିବା ଭାଷା ଓଡ଼ିଆ କିମ୍ବା ଅନ୍ୟ କିଛି ଥିଲା ତାହା ବୁଝି ହେଉନାହିଁ । ବାକ୍ୟ ବୁଝିବାକୁ ନାକେଦମ ହେବାକୁ ପଡୁଛି । କେଉଁଠି ‘ଶିକ୍ଷା ’ ବଦଳରେ ‘ଶିକ୍ ଷା’ ଲେଖାଯାଇଛି ତ ଆଉ କେଉଁଠି କଳାହାଣ୍ଡି ’ ବଦଳରେ ‘କଳାହାଣ୍ ଡି’ ଲେଖାଯାଇଛି। ଏମିତି ଅନେକ ଜାଗାରେ ତ୍ରୁଟି ପରିଲକ୍ଷିତ ହୋଇଛି । ଏସବୁ ହେଲା ଆମ ସରକାରୀ ବାବୁମାନଙ୍କର ଭାଷା ଜ୍ଞାନ। ଯାହାକୁ ନେଇ ସାହିତ୍ୟିକ, ଭାଷାବିତ୍ ତଥା ବୁଦ୍ଧିଜୀବୀ ଅସନ୍ତୋଷ ବ୍ୟକ୍ତ କରିଛନ୍ତି।
Popular Categories
Previous article
Next article