ଖଇରପୁଟ: ପକ୍କା ରାସ୍ତା ନ ଥିବାରୁ ଗାଁକୁ ଆସିପାରିଲାନି ଆମ୍ବୁଲାନ୍ସ। ଫଳରେ ଗଛରୁ ପଡ଼ି ଚେତାଶୂନ୍ୟ ହୋଇଥିବା ଜଣେ ଗୁରୁତର ଆହତ ବ୍ୟକ୍ତିଙ୍କୁ ପରିବାର ଲୋକେ ଭାରରେ ୬ କିଲୋମିଟର ବୋହିବା ପରେ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଛନ୍ତି। ଏପରି ଚିତ୍ର ମାଲକାନଗିରି ଜିଲା ଖଇରପୁଟ ବ୍ଲକ ରାସବେଡା ପଞ୍ଚାୟତ ତାଗାବେଡା ଗ୍ରାମରେ ଦେଖିବାକୁ ମିଳିଛି।
ତାଗାବେଡା ଗାଁର ମଙ୍ଗଳା ମୁଦୁଲି ଗଛରୁ ପଡି ଚେତାଶୂନ୍ୟ ହୋଇ ଯାଇଥିଲେ। ପରିବାର ଲୋକେ ମଙ୍ଗଳାଙ୍କ ଚେତା ଫେରାଇ ଆଣିବାକୁ ବହୁ ଚେଷ୍ଟା କରି ବିଫଳ ହୋଇଥିଲେ। କୌଣସି ସୁଫଳ ନ ମିଳିବାରୁ ଡାକ୍ତରଖାନା ନେବାକୁ ଆମ୍ବୁଲାନ୍ସକୁ ଫୋନ୍ କରିଥିଲେ। ପକ୍କା ରାସ୍ତା ନ ଥିବାରୁ ଗାଁକୁ ଆମ୍ବୁଲାନ୍ସ ଆସିପାରିଲା ନାହିଁ। କୌଣସି ବିକଳ୍ପ ନ ପାଇ ଶେଷରେ ପରିବାର ଲୋକେ ଭାର କରି ୬ କିଲୋମିଟର ବୋହି ପଳାକାଗୁଡ଼ା ଗାଁକୁ ଆଣିଥିଲେ। ସେଠାରୁ ଆମ୍ବୁଲାନ୍ସ ଯୋଗେ ଖଇରପୁଟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଗୁରୁତର ଆହତ ବ୍ୟକ୍ତିଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଛି।
Comments are closed.