କେନ୍ଦୁଝରଗଡ଼: ରାଜ୍ୟବ୍ୟାପୀ ପ୍ରବଳ ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ରାଜ୍ୟ ସରକାର ସମସ୍ତ ସରକାରୀ ଓ ବେସରକାରୀ ଶିକ୍ଷାନୁଷ୍ଠାନକୁ ଛୁଟି ଘୋଷଣା କରିଛନ୍ତି। ଏଭଳିସ୍ଥିତିରେ ଅଙ୍ଗନବାଡିକେନ୍ଦ୍ରକୁ ଖୋଲା ରଖାଯାଇଥିବାରୁ ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି କୋମଳମତି ଶିଶୁମାନଙ୍କୁ ଅଭିଭାବକ ଅଙ୍ଗନବାଡିକେନ୍ଦ୍ରକୁ ପଠାଇବାକୁ ରାଜି ହେଉନାହାନ୍ତିି। ଯେଉଁ କେତେଜଣ ଆସୁଛନ୍ତି ସକାଳ ୮ଟାରେ ଗରମ ରନ୍ଧା ଖାଦ୍ୟ ମଧ୍ୟ ଖାଇ ପାରୁନାହାନ୍ତି। ଯେଉଁ କେତେକ ପିଲା ରନ୍ଧା ଖାଦ୍ୟ ଖାଉଛନ୍ତି ସେମାନଙ୍କ ଦେହ ଖରାପ ହେବାସହ ବାନ୍ତି କରୁଛନ୍ତି। ଅଭିଭାବକ ସକାଳ ୬ଟାରୁ ମଧ୍ୟ ପିଲାମାନଙ୍କୁ କେନ୍ଦ୍ରକୁ ପଠାଇବାକୁ ରାଜି ହେଉନାହାନ୍ତି।
ପ୍ରବଳ ଗ୍ରୀଷ୍ମପ୍ରବାହ ଓ ଅଭିଭାବକଙ୍କ ମତାମତକୁ ଦୃଷ୍ଟିରେ ରଖି ଅଙ୍ଗନବାଡିକେନ୍ଦ୍ରକୁ ତୁରନ୍ତ ବନ୍ଦ ଘୋଷଣା ସହ ପିଲାମାନଙ୍କୁ ରନ୍ଧା ଖାଦ୍ୟ ପରିବର୍ତ୍ତେ ସୁଷମ ଶୁଖିଲା ଖାଦ୍ୟ ବଣ୍ଟନ ପ୍ରଦାନ ନିମନ୍ତେ ଅଲ୍ ଓଡିଶା ଅଙ୍ଗନବାଡି ଲେଡିଜ୍ ୱାର୍କସ ଆସୋସିଏସନ କେନ୍ଦୁଝର ଶାଖା ପକ୍ଷରୁ ଗୁରୁବାର ଜିଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ଅଲ୍ ଓଡିଶା ଅଙ୍ଗନବାଡି ଲେଡିଜ୍ ୱାର୍କସ ଆସୋସିଏସନ କେନ୍ଦୁଝର ଶାଖା ସଭାପତି ଚନ୍ଦ୍ରମଣି ବାରିକ, ସମ୍ପାଦିକା କାମିନୀ ଦେହୁରୀ ଓ ଭାରତୀୟ ମଜଦୁର ସଂଘ ରାଜ୍ୟ ଉପସଭାପତି ଡାକ୍ତର ମହାନ୍ତଙ୍କ ନେତୃତ୍ୱରେ ଏକ ପ୍ରତିନିଧିମଣ୍ଡଳୀ ଜିଲାପାଳଙ୍କୁ ଭେଟି ଉପରୋକ୍ତ ଦାବି ଜଣାଇବା ସହ ଯୋଡା ସହରାଞ୍ଚଳ ଟଲକହାଟିଂ ଅଙ୍ଗନବାଡିକେନ୍ଦ୍ରରେ କାର୍ଯ୍ୟରତ ଅଙ୍ଗନବାଡିକର୍ମୀଙ୍କୁ ଦୀର୍ଘ ୧୧ମାସ ଧରି ବେତନ ମିଳିନଥିବାରୁ ତୁରନ୍ତ ବେତନ ପ୍ରଦାନ ନିମନ୍ତେ ସଂଘ ପକ୍ଷରୁ ଜିଲାପାଳଙ୍କ ନିକଟରେ ଅନୁରୋଧ କରାଯାଇଛି।
