ବେଙ୍ଗାଲୁରୁ: ରାଜ୍ୟର ୧୦୮ଟି ପୌରପରିଷଦରେ ଆସନ୍ତା ୨୯ ତାରିଖରେ ଅନୁଷ୍ଠିତ ହେବାକୁ ଥିବା ନିର୍ବାଚନରେ ଜେଡିଏସ୍ ଏକାକୀ ଲଢ଼ିବ ବୋଲି ଦଳର ସୁପ୍ରିମୋ ଏଚ୍ ଡି ଦେବେଗୌଡ଼ା ସୂଚନା ଦେଇଛନ୍ତି। ରାଜ୍ୟରେ ଏବେ କଂଗ୍ରେସ-ଜେଡିଏସ୍ ମେଣ୍ଟ ସରକାର ଗଠନ କରିଥିଲେ ହେଁ ପୌର ପରିଷଦ ନିର୍ବାଚନରେ ଜେଡିଏସ୍ ଏକାକୀ ଲଢ଼ିବା ଘୋଷଣା ପରେ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଛି। ଏ ସମ୍ପର୍କରେ ଦେବେଗୌଡ଼ା କହିଛନ୍ତି ଯେ ସ୍ଥାନୀୟ ଅଞ୍ଚଳର ସମସ୍ୟା ଓ ଗୁରୁତ୍ୱ ଦୃଷ୍ଟିରୁ ଅଧିକାଂଶ ସ୍ଥାନରେ ମେଣ୍ଟ ସମ୍ଭବ ନୁହେଁ। ତେଣୁ ସବୁ ସ୍ଥାନରେ ଏକାକୀ ଲଢ଼ିବାକୁ ଜେଡିଏସ୍ ନିଷ୍ପତ୍ତି ନେଇଛି। ସ୍ଥିତି ଅନୁଧ୍ୟାନ କରିବାକୁ ଆସନ୍ତା ୧୧ ତାରିଖରୁ ୧୪ ତାରିଖ ପର୍ଯ୍ୟନ୍ତ ଜେଡିଏସ୍ର ବରିଷ୍ଠ ନେତାମାନେ ରାଜ୍ୟର ବିଭିନ୍ନ ଅଞ୍ଚଳ ଗସ୍ତ କରିବେ ବୋଲି ସେ ସୂଚନା ଦେଇଛନ୍ତି।
ଗତକାଲି କର୍ଣ୍ଣାଟକ କଂଗ୍ରେସ ସଭାପତି ଦିନେଶ ଗୁଣ୍ଡୁ ରାଓ ଦେବେଗୌଡ଼ାଙ୍କ ବାସଭବନରେ ରୁଦ୍ଧଦ୍ୱାର ବୈଠକରେ ଆଲୋଚନା କରିଥିବା ଜଣାପଡ଼ିଛି। ଅବଶ୍ୟ ଏହାକୁ ଅନୌପଚାରିକ ସାକ୍ଷାତ ଆଲୋଚନା ବୋଲି ଶ୍ରୀ ରାଓ କହିଛନ୍ତି। ଆସନ୍ତା ପୌର ପରିଷଦ ନିର୍ବାଚନରେ ମେଣ୍ଟ ନ ହେଲେ ମଧ୍ୟ ଜେଡିଏସ୍ ପ୍ରାର୍ଥୀଙ୍କୁ କଂଗ୍ରେସ ପକ୍ଷରୁ ସହଯୋଗ ମିଳିବ ବୋଲି ସେ ସୂଚନା ଦେଇଛନ୍ତି।
କର୍ଣ୍ଣାଟକ ରାଜନୀତି: ପୌର ପରିଷଦ ନିର୍ବାଚନରେ ଏକାକୀ ଲଢ଼ିବ ଜେଡିଏସ୍
Popular Categories
Previous article
Next article