ଅଜଣା ଗାଡ଼ି ଧକ୍କାରେ ପରିବା ବିକ୍ରେତାଙ୍କ ମୃତ୍ୟୁ, କ୍ଷତିପୂରଣ ଦାବିରେ ରାସ୍ତାରୋକ

କଣ୍ଟାବାଞ୍ଜି: କଣ୍ଟାବାଞ୍ଜି ସହର ଚଟୁଅନକା ଶାନ୍ତି ପେଟ୍ରୋଲ ପମ୍ପ ନିକଟ ପଞ୍ଜାବି ଢ଼ାବା ପାଖରେ ଶୁକ୍ରବାର ଏକ ଅଜଣା ଗାଡ଼ି ଧକ୍କାରେ ଜଣେ ପରିବା ବିକ୍ରେତାଙ୍କ ମୃତ୍ୟୁ ଘଟିଛି। ଦୁର୍ଘଟଣା ଏତେ ଜୋର ଥିଲା ଯେ, ବେଲପଡା ଥାନା ମୁଣ୍ଡାପଲା ଗାଁର ଜଳନ୍ଧର ଦୀପଙ୍କ(୪୫)ଙ୍କ ଘଟଣା ସ୍ଥଳରେ ହିଁ ମୃତ୍ୟୁ ଘଟିଛି। ଜଳନ୍ଧର ପରିବା ବିକ୍ରି କରି ନିଜ ପରିବାର ପ୍ରତିପୋଷଣ କରିଥାନ୍ତି। ଆଜି କିଛି ପରିବା କଣ୍ଟାବାଞ୍ଜି ସାପ୍ତାହିକ ବଜାରରୁ କିଣି ପରେ ତାକୁ ନିଜ ଗାଁ ସହ ଆଖପାଖ ଗାଁରେ ବିକ୍ରି କରିବା ଉଦ୍ଦେଶ୍ୟରେ କଣ୍ଟାବାଞ୍ଜି ଆସୁଥିବାବେଳେ ଏହି ଦୁର୍ଘଟଣା ଘଟିଥିଲା।

ଜଳନ୍ଧରଙ୍କ ମୃତ୍ୟୁ ଖବର ତାଙ୍କ ସମ୍ପର୍କୀୟମାନେ ପାଇବା ପରେ ଘଟଣା ସ୍ଥଳରେ ପହଞ୍ଚି ରାସ୍ତାରେ ମୃତଦେହ ରଖିବା ସହ ଟାୟାର ଜାଳି କଣ୍ଟାବାଞ୍ଜି-ବଲାଙ୍ଗିର ମୁଖ୍ୟ ରାସ୍ତା ଅବରୋଧ କରିଥିଲେ। ଦୁର୍ଘଟଣା ଘଟାଇଥିବା ଗାଡ଼ି ଚାଳକକୁ ପୁଲିସ ଖୋଜି ତାକୁ ଦଣ୍ଡିତ କରିବା ସହ ମୃତକଙ୍କ ପରିବାରକୁ କ୍ଷତିପୂରଣ ଦାବି କରାଯାଇଥିଲା। ଘଟଣାର ଖବର ପାଇ ଥାନା ଅଧିକାରୀ ରଶ୍ମିତା ବେହେରା, ଏସ.ଆଇ. ଅବିନାଶ ନାୟକ, ପୁର୍ଣ୍ଣିମା ଓରାମ, ଏଏସଆଇ ଅଶୋକ ପ୍ରଧାନଙ୍କ ସହ ଅନ୍ୟ ପୁଲିସ କର୍ମଚାରୀ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କୁ ବୁଝାସୁଝା କରିବା ସହ ଦାବି ପୂରଣ କରାଯିବ ବୋଲି ପ୍ରତିଶ୍ରୁତି ଦେଲା ପରେ ରାସ୍ତାରୋକ ହଟିଥିଲା। କଣ୍ଟାବାଞ୍ଜି ଡାକ୍ତରଖାନାରେ ପୁଲିସ ଶବ ବ୍ୟବଚ୍ଛେଦ କରାଇ ପରିବାର ବର୍ଗଙ୍କୁ ମୃତଦେହ ହସ୍ତାନ୍ତର କରାଯାଇଛି। ପୁଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି।