କଂଟାବାଞ୍ଜି: ଗାଁ ଲୋକ ନିଜ ଅଞ୍ଚଳରେ ରହିବେ । ଭଲରେ ରହି ନିଜ ଭିଟାମାଟିରେ କାମ କରି ଦୁଇ ପଇସା ରୋଜଗାର କରି ପରିବାର ଚଲେଇବେ ବୋଲି ରାଜ୍ୟ ସରକାର କରିଛନ୍ତି ଅନେକ ଯୋଜନା । ହେଲେ ଏହି ସବୁ ଯୋଜନା ଯେମିତି ତୁରେକେଲା ବ୍ଲକ ଚଟୁଅନକା ପଞ୍ଚାୟତରେ ଠିକରେ କାର୍ଯ୍ୟକାରି ହେଉନାହିଁ । ମନରେଗା ଯୋଜନାରେ ଶ୍ରମିକ କାମ କରୁଛନ୍ତି ହେଲେ ସରପଞ୍ଚଙ୍କ ମନମୁଖୀ କାମ ଯୋଗୁ ଶ୍ରମିକ ମାନେ ନିଜ ହକ ଅଧିକାରରୁ ବଞ୍ଚିତ ରହୁଥିବା ଅଭିଯୋଗ ହେଉଛି । ଚଟୁଅନକା ପଞ୍ଚାୟତର ବେହେରେନସିଲେଟ, କୁର୍ଲି ଏବଂ ଚଟୁଅନକା ଗାଁରେ ମନରେଗା ଯୋଜନାରେ ମାଟି କାମ ହେଉଛି । ଶ୍ରମିକ ମାନେ ଏହି କାମରେ ନିୟୋଜିତ ହୋଇଛନ୍ତି ।
ଶ୍ରମିକ ମାନଙ୍କ କାମ ଏବଂ କେଉଁ ମାନେ ଏହି କାମରେ ନିୟୋଜିତ ଅଛନ୍ତି ସେହି ରିପୋର୍ଟ ସରପଞ୍ଚଙ୍କ ଦସ୍ତଖତ କରାଇ ସପ୍ତାହକୁ ଥରେ ରିପୋର୍ଟ ଦିଆଯାଇଥାଏ । ଗତ ଦୁଇ ସପ୍ତାହ ହେଲା ସରପଞ୍ଚ ଦସ୍ତଖତ ଦେବାକୁ ମନା କରି ଦେଇଥିବାରୁ ରିପୋର୍ଟ ଯାଇ ପାରିନାହିଁ । ଯାହା ଫଳରେ ଆଗକୁ ଏହି ୧୫ ଦିନର କାମର ଟଙ୍କା ଶ୍ରମିକ ମାନେ ପାଇବାରୁ ବଞ୍ଚିତ ହେବେ ବୋଲି ଶ୍ରମିକ ମାନେ ଅଭିଯୋଗ କରିଛନ୍ତି । ସରପଞ୍ଚ ଜ୍ଞାନରଞ୍ଜନ ତାଣ୍ଡି ଜଣେ ଭଲ ଲୋକ ବୋଲି ତାଙ୍କୁ ସରପଞ୍ଚ ଭାବେ ପଞ୍ଚାୟତର ଭୋଟର ନିର୍ବାଚିତ କରିଥିଲେ । ହେଲେ ବର୍ତ୍ତମାନ ସମୟରେ ସରପଞ୍ଚ ନିଜ ମନମୁଖି କାମ କରି ଶ୍ରମିକ ମାନଙ୍କ ହକ ଅଧିକାରକୁ ଅଣଦେଖା କରୁଥିବା ଲୋକେ କହୁଛନ୍ତି ।
ଅନ୍ୟ ପକ୍ଷରେ ଶ୍ରମିକ ମାନେ ନିଜର ପାଉଣା ପାଇଁ ସୋମବାର ତୁରେକେଲା ବ୍ଲକ ଅଫିସ ପହଞ୍ଚିଥିଲେ । ସେଠାରେ ବିଡିଓ ଦେବାଷିଶ ସାମଲଙ୍କୁ ସାକ୍ଷାତ କରିବା ସହ ଏକ ଦାବିପତ୍ର ଦେଇଥିଲେ । ନିଶ୍ଚିତ ଭାବେ ଶ୍ରମିକ ମାନେ ତାଙ୍କ ପାଉଣା ପାଇବେ ବୋଲି ବିଡିଓ କହିଛନ୍ତି । ତେବେ ଏଠାରେ ଏକ ବଡ ପ୍ରଶ୍ନ ଆସୁଛି ଶ୍ରମିକ ମାନେ କାମ କରୁଛନ୍ତି କିନ୍ତୁ ସରପଞ୍ଚ କାହିକିଁ ଦସ୍ତଖତ କରିବାକୁ ଅମଙ୍ଗ ହେଉଛନ୍ତି ।
