କାମାକ୍ଷାନଗର: ଢେଙ୍କାନାଳ ଜିଲ୍ଳା ଦାଣ୍ଡିମାଳ ଗ୍ରାମର ଆଞ୍ଚଳିକ ବିକାଶ ପରିଷଦ ପକ୍ଷରୁ ବହୁ ସମସ୍ୟା ନେଇ ଜିଲ୍ଲାପାଳଙ୍କୁ ଦାବି ପତ୍ର ପ୍ରଦାନ କରାଯାଇଛି l ଦାଣ୍ଡିମାଳ ଅଞ୍ଚଳରେ ଝାରଗାଡ଼ିଆ ଠାରୁ ପଞ୍ଚପଟି ରାସ୍ତାକୁ ମରାମତି କରାଯିବା, ବର୍ତ୍ତମାନ ବାଇପାସ ଏନଏଚ୍ ୫୫ ନୂତନ ହେବା ଦ୍ଵାରା ପୁରୁଣା ରାସ୍ତାରେ ଗାଡି ଚଳାଚଳ ଅସମ୍ଭବ ହୋଇପଡିଛି । ଏହି ରାସ୍ତାରେ ଦାଣ୍ଡିମାଳ ଅଞ୍ଚଳ ବ୍ୟତିତ ବଳରାମପୁର, କାଶିଆଡିହି, ବାବନ୍ଧ, ଗଞ୍ଜରା ଗ୍ରାମର ଜନ ସାଧାରଣ ଯାତାୟାତ କରିଥାଆନ୍ତି ।
ଚଳିତ ବର୍ଷ ପାର୍ବଣ ଦଶହରା ଉତ୍ସବ ଏ ଅଞ୍ଚଳରେ ପ୍ରାୟ ୫୦ ବର୍ଷ ହେଲା ପାଳିତ ହୋଇ ଆସୁଛି । ଗତ ଦୁଇ ବର୍ଷ ଧରି କରୋନା କଟକଣା ଥିବାରୁ ଦଶହରା ପୂଜା ବିଧି ଅନୁଯାୟୀ ପାଳନ ହୋଇଆସୁଛି । କିନ୍ତୁ ଚଳିତ ବର୍ଷ ଦଶହରା ପୂଜା ମହାସମାରୋହରେ ୨୨ ଟି ପୂଜା ମଣ୍ଡପରେ ପୂଜା କରାଯିବାକୁ ସ୍ଥିର ହୋଇଥିବା ବେଳେ ଅନୁଷ୍ଠାନର ପକ୍ଷରୁ ପୂଜା ପୂର୍ବରୁ ରାସ୍ତା ମରାମତି ସହିତ ସମ୍ପୂର୍ଣ୍ଣ ପିଚୁ କରିବାକୁ ଦାବି କରାଯାଇଛି । ସଭାପତି ମୋହନ ମୁରାରୀ ମିଶ୍ର, ଚନ୍ଦ୍ରଶେଖର ସାହୁ, ଦିବାକର ରାଉତ, ଶିବ ପ୍ରସାଦ ରାଉତ, ଧନେଶ୍ୱର ରାଉତ, ଗଙ୍ଗାଧର ରାଉତଙ୍କ ଉପସ୍ଥିତରେ ଜିଲ୍ଲାପାଳ ସରୋଜ କୁମାର ସେଠୀ ପ୍ରମୁଖ ଏହି ଦାବି ପତ୍ର ପ୍ରଦାନ କରିଥିଲେ ।
