କାମାକ୍ଷାନଗର: କାମାକ୍ଷାନଗର ଥାନା ବିଜାଡିହ ଗ୍ରାମରେ ଝିଅ ହେବାର ଆଶଙ୍କା କରି ଜଣେ ୬ ମାସର ଗର୍ଭବତୀଙ୍କୁ ହତ୍ୟା କରାଯାଇଥିବାର ସୋମବାର ଥାନାରେ ଅଭିଯୋଗ ହୋଇଛି। ମୃତ ମହିଳା ଜଣଙ୍କ ବିଜାଡିହ ଗାଁର ତନୁ ରାଉତ। ତନୁ ୬ ମାସ ହେବ ଗର୍ଭବତୀ ଥିବା ଜଣାପଡିଛି। ତେବେ ତାଙ୍କର ପୂର୍ବରୁ ଏକ ୪ ବର୍ଷର ଶିଶୁ କନ୍ୟା ମଧ୍ୟ ରହିଛି । ପୁନଶ୍ଚ ଝିଅ ହେବାର ଆଶଙ୍କା କରି ତନୁଙ୍କ ସ୍ୱାମୀ ରାଜେଶ ରାଉତ ତାଙ୍କୁ ମାନସିକ ଓ ଶାରୀରିକ ନିର୍ଯାତନା ଦେଇ ଆସୁଥିଲେ ଏବଂ ତାଙ୍କୁ ଆଜି ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି। ତନୁଙ୍କ ବାପା ପରଜଙ୍ଗ ଥାନା ବସୁଲେଇ ଗାଁର ନିତ୍ୟାନନ୍ଦ ଭୁତିଆ ୨୦୧୮ ମସିହାରେ ଝିଅକୁ ବିଜାଡ଼ିହ ଗ୍ରାମର ରାଜେଶଙ୍କୁ ବୈଦିକ ରୀତିରେ ବିବାହ କରିଥିଲେ। ବିବାହର କିଛି ମାସ ପାରିବାରିକ ଜୀବନ ଠିକ ଠାକ ଚାଲିଥିଲା। ପ୍ରଥମେ ତନୁଙ୍କର ଏକ ଝିଅ ଜନ୍ମ ହୋଇଥିଲା। ଚାରିବର୍ଷ ପରେ ତନୁ ପୁନଶ୍ଚ ଗର୍ଭବତୀ ପରେ ଝିଅ ହେବାର ଆଶଙ୍କା କରି ସ୍ୱାମୀ ରାଜେଶ ନିର୍ଯାତନା ଦେଇଥିବା ଅଭିଯୋଗ ହୋଇଛି। ଯାହାକୁ ନେଇ ପରିବାର ଲୋକେ କାମାକ୍ଷାନଗର ଥାନାରେ ଅଭିଯୋଗ କରିଛନ୍ତି। ଏହି ଅଭିଯୋଗ ପରେ ପୁଲିସ ତନାଘନା ତଦନ୍ତ ଆରମ୍ଭ କରିଛି। ସେପଟେ ତନୁଙ୍କ ସ୍ୱାମୀ ରାଜେଶ ଫେରାର ଥିବା ଜଣା ପଡିଛି।
Pay Online
Comments are closed.