ସୁଭଦ୍ରା ଯୋଜନା ବ୍ୟାଙ୍କ ପାସ ବହି ସହିତ ଆଧାର ଓ ମୋବାଇଲ ନମ୍ବର ସଂଯୋଗ କରିବା ପାଇଁ ଗ୍ରାହକଙ୍କ ଭିଡ଼

କଲ୍ୟାଣସିଂହପୁର: ରାୟଗଡା ଜିଲା କଲ୍ୟାଣସିଂହପୁର ବ୍ଲକରେ ଥିବା  ଭାରତୀୟ ଷ୍ଟେଟବ୍ୟାଙ୍କରେ ଗ୍ରାହକଙ୍କ ଭିଡ଼ ହେଉଥିବା ଦେଖିବାକୁ ମିଳିଛି। ବ୍ଲକରେ ୧୪ଟି ପଞ୍ଚାୟତ ରହିଛି। ଏଥିରେ କଲ୍ୟାଣସିଂହପୁର ଓ ମାଝୀଗୁଡାରେ ଦୁଇଟି ଭାତୀୟ ଷ୍ଟେଟବ୍ୟାଙ୍କ ରହିଛି। ସଦରରେ ଗୋଟିଏ ବ୍ୟାଙ୍କ ରହିଥିବା ଯୋଗୁଁ ପ୍ରତ୍ୟେକ ଦିନ ଗ୍ରାହକଙ୍କ ଭିଡ ହେଉଥିବା ବେଳେ ବର୍ତ୍ତମାନ ସୁଭଦ୍ରା ଯୋଜନା ପାଇଁ ମଧ୍ୟ  ଗ୍ରାହକଙ୍କ ଭିଡ଼ ଲାଗିରହୁଛି।

ସୁଭଦ୍ରା ଯୋଜନା ବ୍ୟାଙ୍କ ପାସ ବହି ସହିତ ଆଧାର ଓ ମୋବାଇଲ ନମ୍ବର ସଂଯୋଗ କରିବା ପାଇଁ ଗ୍ରାହକଙ୍କ ଭିଡ଼ ହେଉଥିବା ଜଣାପଡିଛି। ଯାହାଫଳରେ  ବ୍ୟବସାୟ ,ଅନ୍ୟ ଗ୍ରାହକ ମାନେ ଟଙ୍କା ବାନ୍ଧିବା ଓ ଉଠାଇବା ପାଇଁ ଘଣ୍ଟା ଘଣ୍ଟା ଧରି ଅପେକ୍ଷା କରି ଠିଆ ହେବାକୁ ପଡୁଛି। ଉକ୍ତ ବ୍ୟାଙ୍କଉପରେ କଳାହାଣ୍ଡି ଜିଲାର କିଛି ଅଞ୍ଚଳ ,କାଶୀପୁର ବ୍ଲକର କିଛି ଅଞ୍ଚଳ, ବିଦ୍ୟାଳୟ ଛାତ୍ର ଛାତ୍ରୀ, ଆବାସ ଯୋଜନା, ବ୍ୟବସାୟୀ, ବିଧବା ବାର୍ଦ୍ଧକ୍ୟ ବିକଳାଙ୍ଗ ଭର୍ତ୍ତା , ପେନସନ ,ସୁନା ଋଣ, ବ୍ୟବସାୟୀଙ୍କୁ ଋଣ  ବ୍ୟବସ୍ଥା କରାଯାଉଛି। ଏତେ ଗୁଡିଏ ଗ୍ରାହକଙ୍କ ପାଇଁ ଗୋଟିଏ ବ୍ୟାଙ୍କ ହୋଇଥିବା ଯୋଗୁଁ ଗ୍ରାହକ ମାନେ ନାହିଁ ନଥିବା ଅସୁବିଧା ଭୋଗୁଛନ୍ତି ।

ବର୍ତ୍ତମାନ ବ୍ୟାଙ୍କରେ କର୍ମଚାରୀ ଅଭାବ ଯୋଗୁଁ ଗ୍ରାହକଙ୍କ କାର୍ଯ୍ୟ ବିଳମ୍ବ ହେଉଥିବା ଗ୍ରାହକମାନେ ଅଭିଯୋଗ କରିଛନ୍ତି ।ନିୟମଗିରି ପାହାଡ ରେ ବସବାସ କରୁଥିବା ଆଦିମ ବିରଳ ଜନଜାତି ଡଙ୍ଗରିଆ କନ୍ଧ ମହିଳା ପୁରୁଷ ମାନେ ସକାଳ ୭ରୁଆସି ବ୍ୟାଙ୍କ ସମ୍ମୁଖରେ ବସିଥିବା ମଧ୍ଯ ଦେଖିବାକୁ ମିଳିଛି। ଉକ୍ତ ବ୍ୟାଙ୍କରେ ଜଣେ ବ୍ୟାଙ୍କ ଶାଖା ପରିଚାଳକ ବିଶ୍ୱମୋହନ ମହାପାତ୍ର ଓ ଦୁଇ ଜଣ  କେସିୟର  ରହିଛନ୍ତି। ଯାହାଫଳରେ କାର୍ଯ୍ୟରେ ବାଧା ସୃଷ୍ଟି ହେଉଛି । ଗ୍ରାହକଙ୍କ ନିମନ୍ତେ ପାନୀୟ ଜଳର ବ୍ୟବସ୍ଥା ମଧ୍ୟ କରାଯାଉନାହିଁ । ତୁରନ୍ତ ପ୍ରଶାସନ ଉକ୍ତ ବ୍ୟାଙ୍କ ପ୍ରତି ଦୃଷ୍ଟି ଦେଇ ଆବଶ୍ୟକ ଅନୁଯାୟୀ ପଦବୀ ଗୁଡିକ ପୁରଣ କରିବା ପାଇଁ ବ୍ଲକ ବାସୀ ଦାବି କରିଛନ୍ତି।