କଲମପୁର: ଗୁମାବାହାଲ ଗ୍ରାମର ଠେଲକୋ ସାଗର ବନ୍ଧ ଗୁରୁବାର ଅପରାହ୍ନରେ ଭାଙ୍ଗି ଯାଇଛି। ଯାହା ଫଳରେ ତଳମୁଣ୍ଡର ଚାଷ ଜମିରେ ଏବେ ପାଣି ପଶି ଧାନ ଚାଷ ନଷ୍ଟ ହେବାର ଆଶଙ୍କା କରାଯାଉଛି।
ସୂଚନା ଅନୁସାରେ, ଗୁମାବାହାଲ ଗ୍ରାମରେ ଥିବା ଠେଲକୋ ସାଗର କଲମପୁର ପଂଚାୟତର ଆୟର ଏକ ପନ୍ଥା। ଏହି ସାଗରର ପାଣିରେ ଚାଷ ଜମିକୁ ଜଳ ସେଚନ ଯୋଗାଇ କିଛି ଚାଷୀଙ୍କ ଚାଷ କାର୍ଯ୍ୟ ପାଇଁ ବିନିଯୋଗ ହେଉଥିବା ବେଳେ ମାଛ ପୋଖରୀ ଭାବେ ପଂଚାୟତର ଆୟ ବର୍ଦ୍ଧିତ କରିଥାଏ। କିନ୍ତୁ ଗତ କିଛି ବର୍ଷ ହେବ ଠେଲକୋ ସାଗରର ମରାମତି ଦିଗରେ ପ୍ରଶାସନ ଅଥବା ସ୍ଥାନୀୟ ପ୍ରତିନିଧି ନିରବ ରହିଥିବାରୁ ସାଗାରର ବନ୍ଧ ସବୁ ଦୁର୍ବଳ ହୋଇ ପଡ଼ିଛି। ଏଭଳି ସ୍ଥିତିରେ ଗତ ଦୁଇ ଦିନ ଧରି ଲଗାଣ ବର୍ଷା ଯୋଗୁଁ ଗୁରୁବାର ଅପରାହ୍ନରେ ସାଗାରର ବନ୍ଧ ଭାଙ୍ଗି ଯାଇଛି। ଯାହା ଫଳରେ ସାଗରର ତଳ ମୁଣ୍ଡରେ ଥିବା ଓମ୍ ପ୍ରକଶ ଶର୍ମାଙ୍କ ଚାଷ ଜମିରେ ପାଣି ପଶି ଯାଇ ତାଙ୍କର ପ୍ରାୟ ୧୦ ଏକର ଚାଷ ଜମି ସମେତ ଅନ୍ୟ କିଛି ଚାଷୀଙ୍କ ଜମିରେ ପାଣି ଜମି ରହି ଚାଷ ନଷ୍ଟ ହେବାର ଆଶଙ୍କା କରାଯାଉଛି।
ପ୍ରାୟ ୧୮ ଏକରର ଏହି ସାଗରକୁ କିଛି ଲୋକ ଜବର ଦଖଲ କରି ନେଇଛନ୍ତି। ପ୍ରଶାସନର ଉଦାସିନତା ଯୋଗୁଁ ଦିନକୁ ଦିନ ସାଗରର ପରିଧି ହ୍ରାସ ପାଇବା ସହ ଜଳ ଧାରଣ କ୍ଷମତା କମିଯାଉଛି। ରାଜ୍ୟ ଏବଂ କେନ୍ଦ୍ର ସରକାର ଦେଶ ସ୍ୱାଧିନତାର ୭୫ ବର୍ଷ ପୂର୍ତି ଅବସରରେ ଅମୃତ ମହୋତ୍ସବ ପାଳନ କରି ଏହି ସବୁ ଜଳ ଉତ୍ସକୁ ସୁରକ୍ଷିତ ରଖିବା ପାଇଁ ଅନୁଦାନ ଯୋଗାଉଥିବା ବେଳେ ସ୍ଥାନୀୟ ପ୍ରଶାସନ ନିରବ ଯୋଗୁଁ ଏହି ଠେଲକୋ ସାଗର ଏବେ ପରିତ୍ୟକ୍ତ ହେବାରେ ଲାଗିଛି। ତେଣୁ ତୁରନ୍ତ ଏଥିପ୍ରତି ଗୁରୁତ୍ୱ ଦେବା ପାଇଁ ସାଧାରଣରେ ଦାବୀ ହେଉଛି।
Comments are closed.