ପଶ୍ଚିମା ଝଡ଼ ପ୍ରଭାବ: ଭାଙ୍ଗିଲା ଗଛ, ଉଡ଼ିଲା ଘରର ଛାତ, ଅଳ୍ପକେ ବର୍ତ୍ତିଲେ ବୃଦ୍ଧ

କଲମପୁର : କଲମପୁର ତହସିଲ ଅଂଚଳରେ ରବିବାର ବିଳମ୍ବିତ ରାତିରେ ପଶ୍ଚିମା ଝଡ଼ ପ୍ରଭାବରେ କଲମପୁର ଜୁନାଗଡ଼ ମୁଖ୍ୟ ରାସ୍ତାର କଲମପୁର ଦେଶୀ ମଦ ଭାଟି ନିକଟେର ଏକ ବିରାଟକାୟ ଗଛ ଭାଙ୍ଗି ପଡ଼ିଥିଲା। ଏହାଦ୍ୱାରା ଯାନ ବାହାନ ଚଳାଚଳ କିଛି ସମୟ ଧରି ବନ୍ଦ ରହିଥିଲା। ତୁରନ୍ତ ସ୍ଥାନୀୟ ଅଗ୍ନିଶମ ବାହିନୀ କର୍ମଚାରୀ ଘଟଣାସ୍ଥଳରେ ପହଞ୍ଚି ଗଛକୁ କାଟି ସଫା କରିବା ପରେ ଯାତାୟତ ସ୍ୱାଭାବିକ ହେଇଥିଲା। ସେହିଭଳି କର୍ମେଲ ଗ୍ରାମର ଅଧିଷ୍ଠାତ୍ରୀ ଦେବୀ କର୍ମେଲେନବୁଢି ମନ୍ଦିର ନିକଟରେ ବିରାଟକାୟ ଗଛ ଭାଙ୍ଗି ମନ୍ଦିରର କାନ୍ଥ ଏବଂ ନିକଟରେ ଥିବା ନଳକୂଅ ଉପରେ ପଡ଼ିଯାଇଥିଲା। ଯାହା ଦ୍ୱାରା ନଳକୂଅ ନଷ୍ଟ ହୋଇଥିବା ବେଳେ ମନ୍ଦିର ଅଳ୍ପକେ ରକ୍ଷା ପାଇଯାଇଛି। ସୋମବାର ସକାଳେ ସ୍ଥାନୀୟ ଅଗ୍ନିଶମ କର୍ମଚାରୀ ଘଟଣା ସ୍ଥଳରେ ପହଞ୍ଚି ଗଛ କାଟି ସଫା କରିବା ସହ ଏକ ଜେସିବି ସହାୟତାରେ ଗଛ ଗଣ୍ଡିକୁ ହଟାଇଥିଲେ। ଏହି ପଶ୍ଚିମା ଝଡ଼ର ପ୍ରଭାବରେ ବରଗାଁ ସନ୍ତୋଷ ପାତ୍ରଙ୍କ ଘରର ଛାତ ଉଡିଯାଇ ନିକଟରେ ଥିବା ପୋଖରୀରେ ପଡ଼ିଥିଲା। ଘରର ସମସ୍ତ ଆସବାବ ପତ୍ର ପାଣିରେ ଭିଜି ନଷ୍ଟ ହେଇଯାଇଛି। ସେହିଭଳି ଇଛାପୁର ଗ୍ରାମର କପୁର ମାଝୀଙ୍କ ଘରର ଆଜବେଷ୍ଟ ଛାତ ଉଡିଯାଇ ନିକଟରେ ଥିବା ଅସହାୟ ବୃଦ୍ଧ ବଳରାମଙ୍କ ଘର ଉପରେ ପଡ଼ିଥିଲା। ସେଠାରେ ଉପସ୍ଥିତ ଥିବା ବୃଦ୍ଧ ବଳରାମ ଏକ ବଡ ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଛନ୍ତି। ଉଭୟ ବଳରାମ ଏବଂ କପୁର ମାଝୀ ପ୍ରଭାବିତ ହୋଇଛନ୍ତି। କ୍ଷୟକ୍ଷତି ନେଇ ତହସିଲଦାର ରୁଦ୍ର ମୋହନ ନାୟକଙ୍କୁ ଜଣାଇଛନ୍ତି ପ୍ରଭାବିତ ପରିବାର।

Comments are closed.