କଳାହାଣ୍ଡି : ଗାଁର ରାସ୍ତା ଅବସ୍ଥା ଶୋଚନୀୟ ହେତୁ ଆମ୍ବୁଲାନ୍ସ ଯାଇପାରିଲା ନାହିଁ। ଫଳରେ ରବିବାର ଜଣେ ରୋଗୀ ଦୋଳାରେ ବୁହା ହୋଇଥିବା ଜଣାପଡ଼ିଛି। ଏଭଳି ଏକ ଘଟଣା କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ଗୋବର୍ଦ୍ଧନପୁର ପଞ୍ଚାୟତର ଟେକରତଲା ଗାଁରେ ଦେଖିବାକୁ ମିଳିଛି। ସୂଚନା ଅନୁଯାୟୀ, ଟେକରତଲା ଗାଁର ଗୋପାଳ ଗଉଡ଼ଙ୍କ ସ୍ୱାସ୍ଥ୍ୟ ଅବସ୍ଥାଖରାପ ହେବାରୁ ଆମ୍ବୁଲାନ୍ସକୁ ଫୋନ କରିଥିଲେ। ମାତ୍ର ଝିପି ଝିପି ବର୍ଷା ଲାଗି ରହିଥିବାରୁ ଏହି ଗ୍ରାମର ମାଟି ରାସ୍ତା ଅବସ୍ଥା ଖରାପ ଥିବାରୁ ଆମ୍ବୁଲାନ୍ସ ଆସିପାରିନଥିଲା। ଅନ୍ୟ କୌଣସି ଉପାୟ ନଥିବାରୁ ପରିବାର ଲୋକେ ଏକ ଖଟିଆରେ ରାମଚନ୍ଦ୍ରପୁର ପର୍ଯ୍ୟନ୍ତ ଗୋପାଳଙ୍କୁ ନେବା ପରେ ସେଠାରୁ ଆମ୍ବୁଲାନ୍ସ ଯୋଗେ ନର୍ଲା ଓ ପରେ ଭବାନୀପାଟଣା ଡ଼ାକ୍ତରଖାନାକୁ ନିଆଯାଇଛି। ଗ୍ରାମାଞ୍ଚଳରେ ଗମନାଗମନ ପାଇଁ ସରକାର ବିଭିନ୍ନ ଯୋଜନା କରୁଥିଲେ ମଧ୍ୟ ତାହା ଦୁର୍ଗମ ଅଞ୍ଚଳରେ ବାଟବଣା ହେଉଥିବା ଯୋଗୁ ଏପରି ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି।
