ନୂଆଦିଲ୍ଲୀ : ଏମଜି ମୋଟର୍ସ ଇଣ୍ଡିଆରେ ପ୍ରାୟ ୩୮ ପ୍ରତିଶତ ସେୟାର କ୍ୟାପିଟାଲର ଅଧିଗ୍ରହଣ ନେଇ ଜେଏସଡବ୍ଲୁ ଭେଞ୍ଚର୍ସ ସିଙ୍ଗାପୁରକୁ ମଞ୍ଜୁରି ଦେଇଛି କମ୍ପିଟିସନ କମିଶନ ଅଫ୍ ଇଣ୍ଡିଆ(ସିସିଆଇ) । ଏହା ସହିତ ଡାବର ଇଣ୍ଡିଆକୁ ଚଳାଉଥିବା ବର୍ମନ ଫ୍ୟାମିଲିକୁ ମଧ୍ୟ ସିସିଆଇ ରେଲିଗେୟର ଏଣ୍ଟରପ୍ରାଇଜେଜରେ ୫.୨୭ ପ୍ରତିଶତ ଅଂଶଧନ କିଣିବାକୁ ମଞ୍ଜୁରି ଦେଇଛି ।
ଜେଏସଡବ୍ଲୁ ଭେଞ୍ଚର୍ସର ଅଧିଗ୍ରହଣ ମାମଲାରେ ସିସିଆଇ କହିଛି କି ଏହି ଚୁକ୍ତିରେ କ୍ରେତା ନୂଆ ଏଣ୍ଟିଟି ଯିଏ ଏପର୍ଯ୍ୟନ୍ତ କୌଣସି ବି ଆକ୍ଟିଭିଟିରେ ସାମିଲ ନାହିଁ । ଏହାର ମାଲିକାନା ହକ୍ ସମ୍ପୂର୍ଣ୍ଣ ରୂପେ ଜେଏସଡବ୍ଲୁ ଇଣ୍ଟରନ୍ୟାସନାଲ୍ ଟ୍ରେଡକର୍ପ ପାଖରେ ରହିଛି । ସେହିଭଳି ଜେଏସଡବ୍ଲୁ ଯେଉଁ କମ୍ପାନୀରେ ସେୟାର କିଣିଛି ତାର ଭାରତରେ ଅଟୋମୋବାଇଲ ଓରିଜିନାଲ୍ ଇକ୍ବିପମେଣ୍ଟ ମାନୁଫ୍ୟାକ୍ଚରିଂ ବ୍ୟବସାୟ ରହିଛି ।
ରେଲିଗେୟର ଏଣ୍ଟରପ୍ରାଇଜେଜରେ ଅଂଶଧନ କିଣିବାର ମଞ୍ଜୁରି ପରେ ଏହାର ସେୟାରରେ ୪.୩୮ ପ୍ରତିଶତ ତୀବ୍ରତା ଦେଖିବାକୁ ମିଳିଛି । ଏହା ସକାଳେ ୧୦ଟା ୨୦ ମିନିଟରେ ୨୨୬.୫୫ ଟଙ୍କା ସ୍ତରରେ କାରବାର କରୁଥିଲା । ଅନ୍ୟପଟେ ଡାବର ଗ୍ରୁପକୁ ଚଳାଉଥିବା ବର୍ମନ ଫ୍ୟାମିଲି ରେଲିଗେୟର ଏଣ୍ଟରପ୍ରାଇଜେଜ୍ ଲିମିଟେଡର ଚେୟାରମ୍ୟାନ୍ ରଶ୍ମି ସଲୁଜାଙ୍କୁ ମିଳିଥିବା ୨.୧୪ କୋଟି ସେୟାରକୁ ଅନୁଚିତ ବୋଲି କହିଛନ୍ତି । ସଲୁଜାଙ୍କୁ ଏହି ସେୟାର ଏମ୍ପଲଇଜ୍ ଷ୍ଟକ୍ ଓନରସିପ୍ ପ୍ଲାନ୍ ଜରିଆରେ ମିଳିଥିଲା । ବର୍ମନ ଫ୍ୟାମିଲି ମାର୍କେଟ ରେଗୁଲେଟର ସେବିରୁ ଟେକଓଭର ରେଗୁଲେସନ ଅନୁସାରେ ଯାଞ୍ଚ କରିବାକୁ ଦାବି କରିଛି ।
