ନୂଆଦିଲ୍ଲୀ: କଂଗ୍ରେସ ଏକ ବିଶ୍ୱାସ ଯୋଗ୍ୟ ରାଜନୈତିକ ଦଳ ନୁହଁ ବୋଲି ଅଭିଯୋଗ କରିଛନ୍ତି ବହୁଜନ ସମାଜ ପାର୍ଟି ଅଧ୍ୟକ୍ଷା ମାୟାବତୀ। କୌଣସି ପରିସ୍ଥିତିରେ କଂଗ୍ରେସକୁ ବିଶ୍ୱାସ କରାଯାଇ ନପାରେ ବୋଲି ତାହା ପୁଣିଥରେ ପ୍ରମାଣିତ ହୋଇଛି। ପୂର୍ବରୁ ରାଜସ୍ତାନରେ ବହୁଜନ ସମାଜ ପାର୍ଟିର ୬ଜଣଯାକ ବିଧାୟକ ଶାସକ କଂଗ୍ରେସ ଦଳରେ ଯୋଗଦେଇଛନ୍ତି। ମାୟାବତୀ ଏହି ଘଟଣାରେ ତୀବ୍ର ପ୍ରତିକ୍ରିୟା ପ୍ରକାଶ କରି ଏକାଧିକ ଟ୍ୱିଟରେ କହିଛନ୍ତି ଯେ କଂଗ୍ରେସ ସରକାରକୁ ବି.ଏସ୍.ପି. ବିଧାୟକମାନେ ବାହାରୁ ନିସର୍ତ୍ତ ସମର୍ଥନ କରୁଥିଲେ।
ତେବେ ସେମାନଙ୍କୁ ପ୍ରଲୋଭନ ଦିଆଯାଇ ଦଳରେ ସାମିଲ କରାଯାଇଛି ବୋଲି ସେ ଅଭିଯୋଗ କରିଛନ୍ତି। ଅନ୍ୟ ପକ୍ଷରେ ମାୟାବତୀଙ୍କ ବିବୃତ୍ତିରେ ପ୍ରତିକ୍ରିୟା ପ୍ରକାଶ କରି ମୁଖ୍ୟମନ୍ତ୍ରୀ ଅଶୋକ ଗେହେଲଟ କହିଛନ୍ତି, ବି.ଏସ୍.ପି. ବିଧାୟକମାନେ ବିନା ସର୍ତ୍ତରେ ଏବଂ ନିଜ ଇଚ୍ଛା ଅନୁସାରେ କଂଗ୍ରେସରେ ଯୋଗ ଦେଇଛନ୍ତି।
