ମୁମ୍ବଇ: ଜି’ ଟିଭିରେ ପ୍ରସାରିତ ଲୋକପ୍ରିୟ ସଙ୍ଗୀତ ଭିତ୍ତିକ ରିଆଲିଟି ଶୋ ‘ସାରେଗାମାପା’ ର ବିଜେତା ହୋଇଛନ୍ତି ଜବଲପୁରର ଇଶିତା ବିଶ୍ୱକର୍ମା। ରବିବାର ଆୟୋଜିତ ହୋଇଥିବା ଶୋ’ ର ଗ୍ରାଣ୍ଡ୍ ଫିନାଲେରେ ୫ଜଣ ପ୍ରତିଯୋଗୀ ଅସଲମ୍ ମାଜୀଦ, ଐଶ୍ୱର୍ଯ୍ୟା ପଣ୍ଡିତ, ସାହିଲ୍ ସୋଲଙ୍କି, ସୋନୁ ଗିଲ୍, ତନ୍ମୟ ଚତୁର୍ବେଦୀଙ୍କୁ ପଛରେ ପକାଇ ଇଶିତା ଟ୍ରଫି ହାସଲ କରିଛନ୍ତି। ଏଥିସହିତ ତାଙ୍କୁ ୫ ଲକ୍ଷ ଟଙ୍କାର ପୁରସ୍କାର ରାଶି ଓ ଏକ ହୁଣ୍ଡାଇ କାର ମଧ୍ୟ ପ୍ରଦାନ କରାଯାଇଛି। ସେହିପରି ଲକ୍ଷ୍ନୌର ତନ୍ମୟ ଚତୁର୍ବେଦୀ ପ୍ରଥମ ରନର୍ସ ଅପ୍ ହୋଇଥିବା ବେଳେ ଅମୃତସରର ସୋନୁ ଗିଲ୍ ଦ୍ୱିତୀୟ ରନର୍ସ ଅପ୍ ହୋଇଛନ୍ତି। ୧୬ ବର୍ଷିୟା ଇଶିତା ଶୋ’ରେ ସମସ୍ତଙ୍କ ଠାରୁ ବୟସରେ ସାନ ହୋଇ ମଧ୍ୟ ଦର୍ଶକଙ୍କ ଖୁବ୍ ଭଲ ପାଇବା ହାସଲ କରିଥିଲେ।
ଏହି ଶୋ’ ର ବିଚାରପତି ଆସନରେ ଶେଖର ରାଭଜିୟାନୀ, ରିଚା ଶର୍ମା ଓ ୱାଜିଦ୍ ଖାନ୍ ରହିଥିଲେ। ଏଥିସହିତ ଆଦିତ୍ୟ ନାରାୟଣ ଶୋ’ କୁ ହୋଷ୍ଟ କରୁଥିଲେ। ଗ୍ରାଣ୍ଡ ଫିନାଲେ ସମାରୋହରେ ଚଳଚ୍ଚିତ୍ର ‘ମଣିକର୍ଣ୍ଣିକା-ଦି କୁଇନ୍ ଅଫ୍ ଝାନ୍ସୀ’ ର ତାରକା କଙ୍ଗନା ରାଣାୱତ୍ ଓ ଅଙ୍କିତା ଲୋଖଣ୍ଡେ ଅତିଥି ଭାବେ ପହଞ୍ଚିଥିଲେ। କଣ୍ଠଶିଳ୍ପୀ ସୁନିଧୀ ଚୌହାନ୍ ଓ ଜାଭେଦ୍ ଅଲ୍ଲୀ ଟ୍ରଫି ସହ ଶୋ’ ରେ ଏଣ୍ଟ୍ରି କରିଥିଲେ।