ସମାଜ ଡିଜିଟାଲ ଡେସ୍କ: ଆମେରିକା ଦ୍ଵାରା କରାଯାଇଥିବା ଅପରେସନ ‘ମିଡନାଇଟ ହାମର’ର କଡ଼ା ଜବାବ ଦେଇଛି ଇରାନ। ସୋମବାର ରାତିରେ ଇରାନ ଆମେରିକା ସେନା ଘାଟି ଉପରେ ଆକ୍ରମଣ କରିଛି। କାତାରରେ ଥିବା ଆମେରିକୀୟ ସେନା ଘାଟି ଏଆଇ ଉଦେଦ ଉପରେ ଇରାନ ପକ୍ଷରୁ ୬ଟି କ୍ଷେପଣାସ୍ତ୍ର ମାଡ଼ କରାଯାଇଛି। ଏହି ସେନା ଘାଟିଟି ମଧ୍ୟପ୍ରାଚ୍ୟରେ ଆମେରିକାର ସବୁଠୁ ବଡ଼ ବିମାନ ଘାଟି। ବିସ୍ଫୋରଣ ଏତେ ପ୍ରଚଣ୍ଡ ଥିଲା ଯେ, ଏହାର ଶବ୍ଦ କାତାର ରାଜଧାନୀ ଦୋହା ଏବଂ ଲୁସେଲ ପର୍ଯ୍ୟନ୍ତ ଶୁଣିବାକୁ ମିଳିଥିଲା।
ଇରାନର ଏହି ଆକ୍ରମଣ ପରେ କାତାର ସରକାର ସତର୍କତାମୂଳକ ପଦକ୍ଷେପ ସ୍ଵରୂପ ନିଜର ବାୟୁସୀମାକୁ ବନ୍ଦ କରିଦେଇଛନ୍ତି। ଇରାନର ସରକାରୀ ଟେଲିଭିଜନ ଏହି ଆକ୍ରମଣର ଫୁଟେଜକୁ ପ୍ରସାରଣ କରିଛି। ଏହା ଆମେରିକା ଆକ୍ରମଣର ଗୋଟିଏ ଶକ୍ତିଶାଳୀ ଏବଂ ସଫଳ ଜବାବ ବୋଲି ଇରାନ କହିଛି। ଇରାନ ପକ୍ଷରୁ ଏକ ବିବୃତି ଜାରି କରି କୁହାଯାଇଛି ଯେ, ଆମେରିକା ଆମ ପରମାଣୁ ଘାଟି ଉପରେ ଯେତିକି ସଂଖ୍ୟକ ବୋମା ମାଡ଼ କରିଥିଲା, ଆମେ ସେହି ପରିମାଣର କ୍ଷେପଣାସ୍ତ୍ର ମାଡ଼ କରିଛି। ଆକ୍ରମଣ କରାଯାଇଥିବା ସ୍ଥାନ ସହରାଞ୍ଚଳ ଏବଂ ଆବାସିକ ଅଞ୍ଚଳଠାରୁ ବହୁ ଦୂରରେ ଥିଲା। ଆମ ପଡ଼ୋଶୀ ବନ୍ଧୁ କାତାର ପାଇଁ ଆକ୍ରମଣ କୌଣସି ବିପଦ ସୃଷ୍ଟି କରିନାହିଁ ବୋଲି ଇରାନ କହିଛି।
ସୂଚନାଯୋଗ୍ୟ, ଦୁଇ ଦିନ ତଳେ ଆମେରିକା ପକ୍ଷରୁ ଇରାନର ଫୋର୍ଡୋ, ନତାଞ୍ଜ ଏବଂ ଇସଫହାନ ପରମାଣୁ ଘାଟି ଉପରେ ଶକ୍ତିଶାଳୀ ବୋମା ମାଡ଼ କରାଯାଇଥିଲା, ଯାହା ନାଁ ଦିଆଯାଇଥିଲା ଅପରେସନ ମିଡନାଇଟ ହାମର।
Comments are closed.