ନୂଆଦିଲ୍ଲୀ: ବଢିବାରେ ଲାଗିଛି ଭାରତ-କାନାଡ଼ା କୂଟନୈତିକ ବିବାଦ। ଖଲିସ୍ତାନୀ ଆତଙ୍କବାଦୀ ହରଦୀପ ସିଂହ ନିଜାର ହତ୍ୟା ପଛରେ ଭାରତର ହାତ ଥିବା କାନାଡ଼ା କହିବା ପରେ ଦୁଇ ଦେଶ ମଧ୍ୟରେ ତିକ୍ତତା ଦେଖାଯାଇଛି। ଇତି ମଧ୍ୟରେ ଭାରତ ସରକାର ଏକ ନୂଆ ପଦକ୍ଷେପ ଗ୍ରହଣ କରିଛନ୍ତି। କାନାଡା ନାଗରିକ ଆଜିଠାରୁ ଆଉ ଭାରତ ଆସିପାରିବେ ନାହିଁ। କାରଣ ପରବର୍ତ୍ତୀ ବିଜ୍ଞପ୍ତି ଜାରି ହେବା ପର୍ଯ୍ୟନ୍ତ କାନାଡ଼ାରେ ଭାରତୀୟ ଭିସା ସେବା ବାତିଲ କରାଯାଇଛି। ଭାରତ ଆସିବା ପାଇଁ ଉପଲବ୍ଧ ହେଉଥିବା ଭିସା ବ୍ୟବସ୍ଥାକୁ ଗୁରୁବାର ଅନିର୍ଦ୍ଦିଷ୍ଟ କାଳ ପାଇଁ ସରକାର ବାତିଲ କରି ଦେଇଛନ୍ତି।
କାନାଡା ନାଗରିକଙ୍କ ଭିସା ଆବେଦନଗୁଡ଼ିକର ପ୍ରାରମ୍ଭିକ ଯାଞ୍ଚ ପାଇଁ ନିୟୋଜିତ ଘରୋଇ ସଂସ୍ଥା ବିଏଲଏସ୍ ଇଣ୍ଟରନେସନାଲ ପକ୍ଷରୁ କୁହାଯାଇଛି ଯେ, ପରିଚାଳନାଗତ କାରଣ ପାଇଁ ସେପ୍ଟେମ୍ବର ୨୧, ୨୦୨୩ରୁ ପରବର୍ତ୍ତୀ ବିଜ୍ଞପ୍ତି ଜାରି ହେବା ପର୍ଯ୍ୟନ୍ତ ଭାରତୀୟ ଭିସା ସେବା ବାତିଲ କରାଯାଇଛି।
