ସାବଧାନ! ଟଙ୍କାରେ ଦୁଇଦିନ ବଞ୍ଚିପାରେ କରୋନା ଭୂତାଣୁ

ବେଜିଂ : କୋବିଦ – ୧୯ କରୋନା ଭୂତାଣୁ ବ୍ୟାଙ୍କ ନୋଟରେ  ୪୮ ଘଣ୍ଟା ପର୍ଯ୍ୟନ୍ତ ଜୀବିତ ରହିବ ପାରିବ । ଏଥିପ୍ରତି ସାବଧାନ ରହିବା ଆବଶ୍ୟକ । ହଂକଂରୁ ପ୍ରକାଶିତ ସାଉଥ୍ ଚାଇନା ମଣ୍ଣିଂ ପୋଷ୍ଟ (ଏସସିଏମପି)ରେ ସୋମବାର ଏ ସଂକ୍ରାନ୍ତରେ ଏକ ବିସ୍ତୃତ ରିପୋର୍ଟ ପ୍ରକାଶ ପାଇଛି । ହଂକଂ ବିଶ୍ବବିଦ୍ୟାଳୟ ସ୍କୁଲ ଅଫ୍ ପବ୍ଲିକ୍ ହେଲ୍ଥର ଦୁଇ ଗବେଷକ ଲିଓ ପୁ ଲିଟମ୍ୟାନ୍ ଓ ମାଲିକ୍ ପେଇରିସଙ୍କ ଗବେଷଣା ଆଧାରରେ ଏହି ରିପୋର୍ଟ ପ୍ରକାଶିତ ହୋଇଛି ।
ରିପୋର୍ଟ ଅନୁସାରେ କରୋନା ଭୂତାଣୁ ହେଉଛି ଏହାର ସାର୍ସ ଓ ମାର୍ସ ଭୂତାଣୁ ପରିବାରର । ସାର୍ସ ଭୂତାଣୁ ଅନୁକୂଳ ପରିବେଶରେ ଦୀର୍ଘଦିନ ଧରି ବଞ୍ଚି ରହିପାରେ। ଦୁଇ ଗବେଷକ କେଉଁ ପଦାର୍ଥରେ ଭୂତାଣୁ କେତେ ସମୟ ବଞ୍ଚି ରହିପାରେ ସେ ସମ୍ପର୍କରେ ଗବେଷଣା ଆରମ୍ଭ କରିଥିଲେ । ସେଥିରୁ ଭୂତାଣୁ ଟିସୁ ପେପର ଉପରେ ଅତିବେଶୀରେ ୩ ଘଣ୍ଟା ପର୍ଯ୍ୟନ୍ତ ଜୀବିତ ରହିପାରିବ ବୋଲି ଦୁଇ ଗବେଷକ ଦାବି କରିଛନ୍ତି । ସେହିପରି କାଠ ଓ କପଡ଼ା ଉପରେ ଏହା ଦ୍ବିତୀୟ ଦିନ ପର୍ଯ୍ୟନ୍ତ , କାଚ ଓ କପଡ଼ା ଉପରେ ୪୮ ଘଣ୍ଟା ଏବଂ ଇସ୍ପାତ ଓ ପ୍ଲାଷ୍ଟିକ୍ ଉପରେ ୭ ଦିନ ଯାଏ ଏହା ଜୀଇ ରହିବାର ସାମର୍ଥ୍ୟ ରଖିଛି ।
ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ଏହି ଭୂତାଣୁ ସର୍ଜିକାଲ ଫେସ୍ ମାସ୍କରେ ସାତ ଦିନ ପର୍ଯ୍ୟନ୍ତ ବଞ୍ଚି ରିପାରିବ । ତେଣୁ ସର୍ଜିକାଲ ମାସ୍କ ବ୍ୟବହାର କରୁଥିବା ଲୋକମାନେ ଏହାର ବାହାର ପାର୍ଶ୍ବକୁ କେବେ ହେଲେ ସ୍ପର୍ଶ ନ କରିବାକୁ ପେଇରିସ୍ ଚେତାବନୀ ଦେଇଛନ୍ତି । ଏହା ମାସ୍କ ପରିଧାନକାରୀଙ୍କ ପାଇଁ ଘାତକ ସାବ୍ୟସ୍ତ ହୋଇପାରେ ବୋଲି ସେ କହିଛନ୍ତି ।ତେବେ ନିୟମିତ ହାତ ଧୂଆ, ଘରର ବିଶୋଧନୀକରଣ ଓ ବ୍ଲିଚିଂ ବ୍ୟବହାରରେ ଏହାକୁ ନିର୍ମୁଳ କରାଯାଇ ପାରିବ ।
ଅନ୍ୟପକ୍ଷରେ ଏକ ଆମେରିକୀୟ ଜର୍ଣ୍ଣାଲ ‘ନେଚର’ରେ ଦୁଇ ଗବେଷକଙ୍କ ଦ୍ବାରା ପ୍ରକାଶିତ ରିପୋର୍ଟ ଅନୁସାରେ କରୋନା ଭୂତାଣୁ ପ୍ଲାଷ୍ଟିକ୍ ଓ ଷ୍ଟିଲ୍ ଉପରେ ୭୨ ଘଣ୍ଟା ପର୍ଯ୍ୟନ୍ତ ଜୀବିତ ରହି ପାରିବେ ବୋଲି ପ୍ରକାଶ ପାଇଛି । ତେବେ ତମ୍ବା ଉପରେ ଏହା ବେଶୀ ସମୟ ଜୀବିତ ରହିପାରେ ନାହିଁ । ତମ୍ବା ଉପରେ ଏହା ଅତିବେଶୀରେ ୪ ଘଣ୍ଟା ପର୍ଯ୍ୟନ୍ତ ଓ କାର୍ଡ଼ବୋର୍ଡ଼ରେ ୨୪ ଘଣ୍ଟା ପର୍ଯ୍ୟନ୍ତ ବଞ୍ଚି ପାରିବ ବୋଲି ଉଲ୍ଲେଖ କରାଯାଇଛି।